zurückzurück

Stroossewischer 2019

Anzahl Mitwirkende: 2
Comité-Bank seit 1996
stroossewischer@bluemail.ch

 

50 Johr Bluemekinder:
The Happy Singing Hippie-Wischers

Vor ganz gnau ungfohr 50 Johr
isch s ganz Johr Fasnacht gsii und zwoor
hesch blötzlig Männer gseh
mit schööne lange Hoor,
und Faarbe gseh mit LSD,
Reicherstääbli und no meh
und s eerscht mool Fraue hey,
in Bluejeans, stell der voor!

Die ainte sin im Droogerusch
im VW-Bus in Hindukusch,
die andre nit,
die sin uff d Drämmlischiine ghoggt,
hän für der Friide demonschtriert,
mit Bliemli d Schuggerei verziert,
zu lutter Musig sinnlos ummegrockt
und fuudiblutt die braave Bürger gschockt.

Für d Freihait hämmer kämpft
und für e bessri Zuekumft au
hän grevoluzzt, s het nüt gää, wo s nit git!
Mer hän ys engagiert
für glyychi Rächt vo Maa und Frau.
Und wältwyt machen alli zämme mit
und d Baselbieter - joouh… die ehnder nit.

Au miir sin voll derbyy gsii denn
zer Hippie-Zyt,
am Barfi uff der Klaagemuur
zmitzt in de Lyt,
völlig unbeschwäärt,
mit grosser Freud und Luscht,
no in de Windle,
bi der Mamme an der Bruscht.

Die schnälle Drottinett,
wo do elektrisch sin,
hän wie der Tesla
au so Elektronik din.
Und wenn s uff ai Glapf brämst
und s schnätzlet dy verruggt,
het ain z Amerika
us Gschpass uff s Gnöpfli druggt.

Jetz hän sy überall scho gsuecht,
in Irland ääne
und uff der andere Sytte
bis fascht zu de Dääne.
Au bi de Schotte oobe
und in Ängland unde
und hän dä blödi Exit
immer noni gfunde.

Mir diskutiere als eso
vo Frau zu Maa,
wäär vo uns baide do
ächt besser wüsche kaa.
Sie:      Dasch ungerächt, als Frau        
           verdien ych nur e Drittel!
Er:       Jo klar, du hesch au nit
           wien yych, der Doggtertitel.

Sogaar vom Wältruum us
gseesch die Chineesisch Muure!
Hjäh, die Chineese
sin halt scho no schlaui Buure.
Jetz hän die uff em Mond
e Sonde lande loo
und haimlig
ganz ganz vill Chineesli uffe doo,
wo uff der Hintersytte,
will sy ihm nit draue,
no voor em Trump,
e sinnlos langi Muure baue!

Wo die vom Fäärnseh
der Bestatter bestatte dien,
und mir so dört stöhn
und nit bsunders hüüle mien,
hän mir grad nääbedraa
en anders Züügli gseh,
mit e baar Naase
vo der d Basler SVP,
wo die aigeni Partei
begraabe muess.
Und jeede macht e Lätsch,
e Lätsch als letschte Gruess.
Und s hänggt nur rain symbolisch
dört am Friidhoofwäägeli,
vom Lorenz Nägelin
ai ainzigs druurigs Näägeli.

Die Margge Gillette syg
„Das Beste“ schyynts „im Mann“.
Wenn d drüber noochdänggsch,
näärvt die Wäärbig jo scho lang.
Denn wenn das wyter dänggsch
bedüttet daas jo au,
zum Byschbyyl
„OB“ syg „Das Beste in der Frau“.

So, jetz mache miir mitnand
e Yogastund
und s machen alli mit,
denn daas isch schampar gsund.
Die eerschti Yebig haisst,
die isch zem d Mitti finde,
GLÄBBERGÄSSLI,
machet mit, au diir dört hinde!
Der zwaite sait me
RIEBLI WÄÄRFE und dernoo
E WAGGIS KIBBE,
und em UELI riefft me soo.
Jetz kunnt der HIETLILUPF
und denn der E-BIKE-RAADLER
und ganz am Schluss
als Friidensgruess,
der DOPPELADLER.

Melodie: Where Have All The Flowers Gone /
Sag mir wo die Blumen sind

Sag mer wo die Hippie sind,
wo sin sy ächt bli-h-ibe?
Zaig mer no ai Bluemekind
wo sin sy woo?
Die sin hüt sibzig oder soo
und sin in s Bräschten-Alter koo.
Jetz lueg au doo, hejoo,
die hoggen alli do.

S Hippie-Lied
vom Drummeli 2019 in der Vollversion
Melodie: Me and Bobby McG
(Freedom's just another word
for nothin' left to lose)

Friehner syygi d Wält in Oornig gsii,
hän uns die Alte gsait,
denn het e Frau em Maa
no d Fingge nooche drait.
Jä und alli zringelum,
die hän die glyyche Granium
und gmaint, der Willhelm Täll het s gää
in Wirggligkait!

Es hän au alli miesse Voorhäng haa,
as niemert yyneluege kaa,
wenn der Vatter d Kinder schloot
und au sy Frau.
Und het das Frolein, daas vo nääbedra,
vom ne fremde Maa e Bsiechli ghaa,
schimpft d Maiere:
„Jetz lueg emoll die Sau!“
Doch haimlig nämmlig,
wünscht sy sich das au.

Friehner isch es besser gsii,
dir kennet das Zitat
s het Zucht und Oornig
gää in unsrem Staat! ...und Aromat!
Doch öbbis het ys gfählt
in dääre glaikarierte Wält,
dasch d Freyhait gsii
und Musig, won y gschpyyr,
nai, nit unbedingt grad die
vom Wysel Gyr.

Hesch in kiehle Rhyy
e Fuess dryy doo,
hesch Byybeli bikoo,
und uff em Määrtblatz
hän sy raiewyys parkiert,
hän Tschingge nuur vo wytem kennt,
im Gaarte alti Pneu verbrennt,
hän uff der Strooss
de Schwaarze noochegschtiert
und höggschtens
d Näägerli vo Sugus akzeptiert.

Jä, friehner isch es besser gsii,
dir kennet das Zitat
s het Zucht und Oornig
gää in unsrem Staat ...und Wuurschtsalaat
doch Freihait hesch erscht wirgglig,
wenn de nüt z verliere hesch
drumm hämmer uff das pfiffe,
wo mer hänn.
und au nur no daas gmacht,
wo mer wänn.

Mer hän denn zämmegwohnt in wilder Eh,
hesch Farbe gsee, mit LSD
und Männer hey, mit schööne lange Hoor!
Und im Räucherstääblidunscht
hämmer gmaint mer mieche Kunscht
hesch bötzlig Fraue gseh in Hoose,
stell der voor!

Die ainte sin im Droogerusch
im VW-Bus in Hindukusch,
die andre nit,
die sin uff d Drämmlischiine ghoggt,
hän für der Friide demonschtriert,
mit Bliemli d Schuggerei verziert,
zu lutter Musig sinnlos ummegrockt
und fuudiblutt die braave Daame gschockt.

Für d Freihait hämmer kämpft
und für e bessri Zuekumft au
hän grevoluzzt, s het nüt gää, wo s nit git!
Mer hän ys engagiert
für glyychi Rächt vo Maa und Frau.
Und wältwyt machen alli zämme mit
und d Baselbieter - joouh… die ehnder nit.