zurückzurück

Stächpalme 2019

Anzahl Mitwirkende: 3
Comité-Bank seit 2006

Comité-Schnitzelbank Stächpalme, Helge 2019

Bruchsch hüt s Wort Neger in dr Hascht,
no stohsch mit äim Bäi scho im Knascht.
Das isch ganz in mym Sinn, han ich im Stille überläit:
Wehe, wenn mir äin do inne jetz no Rammel säit!

Comité-Schnitzelbank Stächpalme, Helge 2019

E chläine Root an Groosse Root
zur Linderig vo Schreck und Not:
Diet die, wo am lütschte chrääie, doch um Himmels Wille
vor em Gang ans Rednerpult e Viertelstündli stille.

Comité-Schnitzelbank Stächpalme, Helge 2019

I blang uf s Ozeanium.
Dört draa druck ich denn d Nase chrumm,
wenn Hafner, Thüring, Naegelin sich ganz sälbschtvergässe
im Häifischbecki 2 bim Znüni gegesytig frässe.

Comité-Schnitzelbank Stächpalme, Helge 2019

Im Gänfersee stoht blutt e Herr,
Nom de Dieu: dr Maudet Pierre.                                     
Är säift sich yy und rybt und sprützt, dä trybts immer struuber,
doch au mit allne Wasser gwäsche wird er nid ganz suuber.

Comité-Schnitzelbank Stächpalme, Helge 2019

D Frau Macron säit z Paris zum Maa:
He, lueg mi nid so schnippisch aa.
Du gohsch mir uf e Wecker mit dym goggelhafte Doon.
Drum sträik i ab sofort und drääg im Bett e «gilet jaune».

Comité-Schnitzelbank Stächpalme, Helge 2019

Werte Gäste in den Alpen:
Wenn Sie in Kuhfladen tschalpen
und fluchen, weil Sie stinken, dann vergessen Sie ja nie:
Sie würden auch noch hinken, hätte Hörner dieses Vieh.

Comité-Schnitzelbank Stächpalme, Helge 2019

De Chie fehlts neuerdings an Heu,
an Wasser au de Schoof und Söi.
Wiird dä Summer au so troche, laufe glyy scho stramm
d Fisch und Otter uf em Schotter z Fuess uf Rotterdam.

Comité-Schnitzelbank Stächpalme, Helge 2019

D Amherd und au d Keller-Suter
finde mir dr Wahn, dr luter.
Und bis zur nöggschde häisse Wahl, frohlockt my Fründ, dr Walter,
isch jo au d Martullo denn im beschte Mannesalter.

Comité-Schnitzelbank Stächpalme, Helge 2019

Si ligge im e Doppelzimmer,
bewusstlos, äs wird immer schlimmer.
Dr Engelberger schnuuft fascht nümm, dr Weber macht käi Wank.
Dr äinzig Trooscht: Die bäide sin im glyyche Spittel chrank.

Comité-Schnitzelbank Stächpalme, Helge 2019

Meh als äinisch hets mi dunkt:
Dä FCB verdient e Punkt.
Doch vo vierzig Maa si zwanzg verletzt, acht chrank, fümf schiile,
und die, wo nid us Basel sin, die dörfe jo nid spiile.

Comité-Schnitzelbank Stächpalme, Helge 2019

D Baselworld gseht nur no rot.                
D Muschtermäss isch mausedoot.
Mir blybt nur no im Papscht sy Mäss am Sunntig nach de Viere.
Das isch die letschti Mäss, wo d gratis Wyy chasch deguschtiere.

Comité-Schnitzelbank Stächpalme, Helge 2019

E Hirni het er wien e Fliege
und liegt so, dass sich d Bälke biege.
Är strooft sogar no d Höll mit Zöll, si Blick wird immer suurer,
är twitteret em Bundesrot: bruch sofort non e Muurer!

Comité-Schnitzelbank Stächpalme, Helge 2019

Chnorzi-chnorzi-chnorzibüü,
chnorzi-chnorzi-chnorzibüü.
Dasch s Abschiidslied vom Schneider-Ammann und i wett,
dass das als neui Landeshymne ächti Chance het.

Comité-Schnitzelbank Stächpalme, Helge 2019

In dr Bundesrots-WG
hets nach em Zmorge Lämpe geh.
Amherd, Keller-Suter, Somaruga sin am ziggle,
wär dr Cassis vor em Flug nach Brüssel no dörf wiggle.

Comité-Schnitzelbank Stächpalme, Helge 2019

Nid nur dr Marcel het dr Koller,
au dr Streller mäint, bald roll er,  
nid dr Ball, näi, sy Chopf, dr Stocker chas nid fasse.
Mit wäm sell är, wo chuum dörf schutte, jetz denn no go jasse?

Comité-Schnitzelbank Stächpalme, Helge 2019

Als Maa fliegsch hüt dur jede Tescht,
sogar dr Jesus, stell i fescht.
D Maria Magdalena schimpft: bestreu di Haupt mit Äsche,
versprich mr nie meh s Paradyys und: d Fiess chasch sälber wäsche!

Comité-Schnitzelbank Stächpalme, Helge 2019

Im Achterdrämmli luegt me grimmig.
S herrscht e lyycht konfuusi Stimmig.
Was d Fahrgescht und dr Drämmlifierer grauehaft verstört:
Si hän scho syt Minute vo dr Läitstell nüt meh ghört!

S underirdisch Härzstück stockt. 
Dr underirdisch Weschtring schockt.
S underirdisch Parkhuus bruchti dringend non e Dach.
Und denn gits non e Mannschaft, die isch underirdisch schwach.

S letscht Johr hän lut Vogelwarte
vyl Vöögel afo duurestarte,
Doppeladler, Pläitegäier und au allethalbe
uf em griene Raase sälte schöni Neymar-Schwalbe.

Us Indie chunnt dr beschti Tee,
dr beschti Ryys und no vyl meh:
Scho glyy sell s erschte Inderli in Rot und Blau yylaufe.
Das will denn dr Herr Burgener zum beschte Pryys verchaufe.

Im Hafe brennts, bim FCB,
bi BVB und SVP.
Au d Mäss brennt liechterloh und stirbt e häisse Tod uf Rate.
Do frogsch di, wie goht Exit um mit so vyl Kandidate.