zurückzurück

Schnaabelwetzer 2019

Anzahl Mitwirkende: 3
Comité-Bank seit 1997
bis 2004 Fläädermyys
seit 2005 Schnaabelwetzer
schnaabelwetzer@bluewin.ch

 

 

 

 

 

Comité-Schnitzelbank Schnaabelwetzer, Helge 2019


Dä Luusbueb goht jetzt mit sym Schuelsagg in die erschti Klass,
Lehrt Änglisch und Französisch – und het erscht no richtig Spass!
Hello, good morning, help yourself! Good-bye and merci bien!
Dä schwätzt scho jetzt vyl besser Änglisch als dr Parmelin.

Comité-Schnitzelbank Schnaabelwetzer, Helge 2019


S Kamel vom Ibrahim bin-Grufti trottet vor sich hii,
Hoggsch oobe uf em Sattel – fümfi zoobe isch scho gsi.
Uf äimoll stoppt das Trampeltier – worum das so verschriggt?
Dört stoot dr Markus Somm – jo, d BaZ hett dä in d Wüeschti gschiggt.

Comité-Schnitzelbank Schnaabelwetzer, Helge 2019


S het uns äin kürzlig gfroggt: «C'est qui? C'est Guy? Et Guy, c'est qui?»
Und hett grad noochegfroggt: «C'est qui? C'est Guy? Et Guy, c'est qui?»
Verstohsch nur Bahnhof, kunnsch nit druss und s Hirni drüllt und surrt:
So öppe goht s em Parmelin, wenn äine Änglisch schnurrt!

Comité-Schnitzelbank Schnaabelwetzer, Helge 2019


Mit Änglisch het dr Parmelin bekanntlig nüt am Huet.
Dä ka perfäggt Französisch – könne Sii das au so guet?
Manger häisst ässe, pleurer hüüle – s isch wie in dr Schuel.
Und was häisst Maudet? Glääbe, ganz fescht glääbe an sym Stuehl!

Comité-Schnitzelbank Schnaabelwetzer, Helge 2019


Loos, Meier, dasch dr Gnopf, ass s Auti tü-tää-tüü-tä macht.
Wenn mir mit unsrem Tesla ummerötze in dr Nacht,
Und bruuchsch d Sirene äimoll nit – käi Angscht, mir sinn zue dritt:
Denn grööle mir zum Fänschter uss – sunscht ghöört me s Auti nit.


Wo s noch em Ruggtritt vom Herr Schneider-Ammann, Bundesroot,
Au für d Frau Schneider-Schneiter mit dr Wahl drnääbe goot,
Do tröschtet se z Biel-Bängge hinde d Fründin us em Chor:
Gäll, z Ängland wartet dr Prinz Charles jo au scho sibzig Joor!

Comité-Schnitzelbank Schnaabelwetzer, Helge 2019


Was isch das für e müede Club dört z Bärn im Bundeshuus.
Dr Parmelin schnallt s Änglisch nit, em Cassis fäählt dr Pfuus.
Die zwäi, die bruuche dringend Sport – Langlauf duet dääne guet.
Und z Öschtryych spritzt me denn no s richtig Mitteli ins Bluet!

Comité-Schnitzelbank Schnaabelwetzer, Helge 2019


Im Vatikan dört z Rom düen d Unschuldslämmli höggerle
Und hirne, was me mache sott mit däne, wo düen höpperle.
Zue syne Kirchedienerli do mäint dr Papscht: Mäi-mäi!
Jetzt längt s: Grad ohne Znacht ins Bett! – und zwar äimoll elläi!

Comité-Schnitzelbank Schnaabelwetzer, Helge 2019


Im Wald bi-n ych go jogge gsi – kaputt isch jetz my Kneu.
Dr Facharzt het lakonisch gmäint, für ihn isch das nit neu.
Erfahrigsgmäss isch s immer s schwechschte Gliid, wo abverheit:
Hejo, drum isch d Frau Ackermaa jo au uf d Schnuure gheit.

Comité-Schnitzelbank Schnaabelwetzer, Helge 2019


E Riise-Gschyss im Grosse Root, ob s au mit Buschi goht.
S wird gfluecht und debattiert, bis äine usse rächts uffstoht
Und yyneschreit: No so-n e Gnopf? Do bruuchts e scharfs Verbot!
Y ha schon mit zwäi Gnöpf e Gnuusch, wenn ich abstimme sott.

Comité-Schnitzelbank Schnaabelwetzer, Helge 2019


Mir sinn total drgeege, wenn s um gläini Buschi goot.
So Schreihäls, Duumelutscher ghööre nit in Grosse Root.
E Goof, dä chräit, dä gyyxt und schreit – das Buschi wottsch nit gschänggt.
Mir z Basel hänn jo schliesslig unsre Baschi – und das längt!

Comité-Schnitzelbank Schnaabelwetzer, Helge 2019


Die Teslas bi dr Schuggerei, do schnuurt e jeede dryy.
Jo, Baschi, gäll, an dynre Stell, mir hätte das lo syy.
Du arme Siech, jetzt griegsch sogar vom Thurgau diggi Poscht:
Das syg scho skandalös – dä Tesla sufft jo gar käi Moscht.