zurückzurück

Penetrante 2019

Anzahl Mitwirkende: 4
Comité-Bank seit 1997

 

Comité-Schnitzelbank Penetrante, Helge 2019

Mir hänn der „catch a car“ im Parggverbott lo stoo
und sinn mit „Pick a Bike“ der Spaalebäärg ab ko
Mir hänn das Bike in Ryy gheit und e Scooter gschtoole
und ghofft, die dien uns mit em Schugger Tesla hoole

Comité-Schnitzelbank Penetrante, Helge 2019

Fir der Embolo isch das e haarte Schlaag
Au fir in sig s WM-Aus e schwarze Daag
Äär hätti gäärn e Gool gmacht, hätt au gwisst wo s stoot
nur haig äär nit gwisst, wie der Doppeladler goot

Comité-Schnitzelbank Penetrante, Helge 2019

Vo Rom bis Himmelried missbruuche Prieschter Biebli
Griffe bim Stossgebätt de Biebli an iir Riebli
Hätt das d Maria gwisst, die hätti insistiert
und gsait: „der Jesus dää erzie ich reformiert“

Comité-Schnitzelbank Penetrante, Helge 2019

In der griene Fraggtion im Grosse Root
froggsch di was in Sache Riebli deert so goot
Zwai vo acht sinn schwanger, aini stillt ganz keck
Offebar verhiete die mit Juttesegg

Comité-Schnitzelbank Penetrante, Helge 2019

Wo zem Parmelin e Staatschef „Hello“ sait
Runzlet dää si Stirn und sait: „I am not bereit“
Äär iiberleggt und staggelet – “ou, see you later,
ich hool im Zimmer schnäll vo Google der Translator“

Comité-Schnitzelbank Penetrante, Helge 2019

D Queen isch fit und bliibt au wyyterhii der Boss
Der Charles muess warte, sammt sim alte graue Ross
„Worum au Ruggdritt“, maint si nur und lächlet zaart,
„solang der Philipp no so sicher Auti faart“

Comité-Schnitzelbank Penetrante, Helge 2019

Me froggt sich was dää Maudet z Genf der ganz Daag schaffi
An der Regierugssitzig macht äär schiints der Kaffi
und froggt der Abwart, ob äär ebbis hälfe kaa
Grad e so wie bi uns z Baasel d Ackermaa

Comité-Schnitzelbank Penetrante, Helge 2019

Mit Achtesächzig gheit der Minu no druff iine
Äär kunnt in Rääge, quasi ooni Belleryyne
Jetz isch s bassiert, sait äär, das sig au wiirgglig s Dummi
doch schliesslig faart au d BVB fascht ooni Gummi

Comité-Schnitzelbank Penetrante, Helge 2019

Git s jetzt do inn grad ebber, wo gäärn mechti stille?
Denn nämme sii sich Zyt und dien das Buschi fille
Sott der Gallacchi umme syy denn leen Si s syy
Äär het e pfundigi Laggtooseallergie

Comité-Schnitzelbank Penetrante, Helge 2019

Das isch em Sven si Usssicht uss em Kinderwaage
Das arme Buschi muess das stundelang erdraage
Drum duet s so gäärn in d Windle pfunde will am Änd
bruucht s zem Windle wäggsle aifach baidi Händ

Comité-Schnitzelbank Penetrante, Helge 2019

Was uff e Disch koo isch, hesch friener aifach gässe
Jä das kasch hitzedaags jo glattewägg vergässe

Der glaini Fritzli git am Midagsdisch bikannt:
„ich iss das nit, ich bi Spinatintollerant“

Und der Fridolin dä bschtellt fir syyni Frau
gäärn e Schwyynskottlet vonre vegane Sau

Die grieni Lola isst kai Kool und kaini Boone
dää Verzicht wurd sich fir s Klima zimftig loone

Au der Franz läbt iberdryybe schträng vegaan
scho si aige Wirschtli drybt in fascht in Waan

Und der John dää het gäärn Riebli, jetzt muesch loose
äär darf s nit ässe, will äär het e Rieblioose

Doch so richtig bisch im Grund gno erscht derbyy
mit aigner Sexualität UND Allergie

Drum gits im Tibits jetzt versuechswyys, das isch s cooli
seperati WC‘s fir vegani Schwuuli

Und mir sinn d Minderhait – do sinn mir ganz froo
mir sinn Allesfrässer und no Hetero