zurückzurück

Leerer Lämpe 2019

Anzahl Mitwirkende: 2
Comité-Bank seit 2019


Wo n yych grad mit dr Frau haa welle - joo, Si wisse scho….
Do isch an unser Fänschter so n e Droone z fliege koo.
I wiirf grad d Schämpisfläsche, knall se ab ganz effektiv.
Do riefft ain: Yych deerf daas, i bi jo Sozialdetektiv

I maag dä Hampe Wessels, vom Drämmli und vom Bau
Wil dää isch linggs und daas bi n yych als Leerer maischtens au.
Doch wenn me gseet, was dää so kinnglet, giib au yych grad zue:
Dää isch nimm wiirgglig linggs, nai dää isch nur no näb de Schue.

Dr Quentin Tarantino, dää dien Fiess seer intressiere,
Losst in «Pulp Fiction» yyber Fuessmassage diskutiere.
Schläggt au Fiess ab in «Dusk till Dawn» und blaant jetz als Finaal
Wääge däm si erschti Doku z Rieche yyber d Pfaarrerwaal.

Wo myyni Schieler halbblutt ummesitze und dien schwitze
Haa n yych ergläärt, worum sich unser Glimaa duet erhitze.
Soo kennt si vilicht - haa n i dänggt - daas Fach no intressiere
Sythäär sinn si nimm koo, si dien nur no demonschtriere.

S dien myyni Schieler straigge, sinn politisch engagiert
Wil Angscht (Schiss?) si hänn, dass s Glimaa glyy zue Kataschtroofe fiert.
Yych due si understitze, bi au geg die Fliegerei
Die solle n alli straigge, wil yych haa denn immer frei.

Am glyyche Daag zwai Fraue, sinn gweelt in Bundesroot.
Daas syyg sensazionell, wil au rächts derhinderstoot.
Yych find daas nur loogisch, und gaar kai Sensazion:
Die Rächte wänn nur spaare, e Frau koscht nid so vyyl Loon.

Die Lingge maine, zem die Frauerächt au rächt beschitze
Sott me ab jetz bi Waale numme Fraue understitze.
Daas wird se bald scho reie, wenn s in baar Joor bassiert:
Die wänn kai Frau me, wenn d Martullo-Blocher kandidiert.

Me duet im Baaselbiet jetz flyssig driiber diskutiere
Eb Exit jetz au im Spidaal deerf Lyt exekutiere.
Im Baaselbiet d Spidääler sinn an däm seer intressiert:
Denn git s deert ai Behandlig wo au wirgglig funktioniert.

Zem wiirtschaftlig Erfolg haa, doo bruucht s Innovation
Doorum zaalt d Novartis au mängem Brofässer als dr Loon.
Au Lieschtel isch innovativ, zaigt allne wie daas goot:
Miir stryyche - sait dr Lauber - s Waldebuurgerli gääl-root.

S waiss d Schuggerei wie hitte e modäärne Uffdritt goot:
E Tesla, umwältfrintlig, wil er nur im Käller stoot.
S Brobleem kaa me nid leese, sait der Baschi, es isch haart
Daas Auti, daas folgt halt nid, wenn s gscheiter isch als dää wo faart.

Bim Staat wott Baaselland jetz Loon nach Laischtig, es isch haart
Gilt daas au fir d Regierig hänn si deert scho vyyl Gäld gspaart.
Au Leerer sinn bedroffe, doch yych hilf miir ganz elai
Ganz aifach: D Leesig isch, e Säggser koscht fimfhundert Stai.

Beziesch du hit Sozialhilf, wänn si di in d Pflicht jetz nää:
Griegsch s Gäld nur, wenn d bewyysisch, dass d der wirgglig Mie duesch gää.
Di braav an d Reegle haltisch, jo yych find das Gsetz e Hoon:
Es griegt jo jeede Mooned au dr Cramer als si Loon.

Es deerf joo kai Buschi yyne in Saal vom groosse Root
Zem s schitze as s nyt mitgriegt, wo um syyni Zuekunft goot.
Hätt s Buschi gmerggt, wie me deert inne nur schwaaflet anstatt dänggt -
Dää aarm Goof hätt verzwyyflet in die näggscht Steggdoose glängt.

Dr Erdogan sait, s gieng nid, Journalischte soo z behandle
Wo d Saudis dr Kashoggi in e Hamburger verwandle.
Und s haisst «Olivezwyyg» kämpft äär geg d Kurde in sym Ryych -
Do mues me nyydlos zuegää: Dää macht bessri Witz als yych.