zurückzurück

Hanslimaa 2019

Comité-Schnitzelbank Hanslimaa, Helge 2019

Y soll dr Banggnamen ändere – s isch fatal,
denn Hanslimaa sig nid – gschlächtsneutral.
Wel yych elai das Broblem nid leese kaa,
loss ych mii jetz beroote - vo dr Frau Aggermaa!

Comité-Schnitzelbank Hanslimaa, Helge 2019

Won am Voogel Gryff vor em Glingedaal,
dr Alain Berset dr Huet lipft – magistral,
ha mi riisig gfrait, es isch zem schiesse,
wenn sich am Rhyybord - zwai Veegel begriesse!

Comité-Schnitzelbank Hanslimaa, Helge 2019

Die Männermoode macht d Männer kaputt
Oobe Bart – nid rasiert und unde nur blutt
uff em Grind non e tätowierti Glatze,
und e Lumpe - zem poliere statt gratze!

Comité-Schnitzelbank Hanslimaa, Helge 2019

Y kaa kai Änglisch und ha nie Franzesisch gleert
Y bin e Chaot und amme psychisch gschteert.
Doch käms druff aa, wär y drotz schwarz, gääl und root,
ganz sicher dr Allerbeschti - im Bundesroot!

Comité-Schnitzelbank Hanslimaa, Helge 2019

Letschdi bin ych von ere Horde,
Velofaarer iiberfaare worde.
Jetz liig y im Spittel, und dängg wie goots z Basel wyter?
Iiberfaart niemerts dr Wessels – jä denne wird’s Schyter!

Comité-Schnitzelbank Hanslimaa, Helge 2019

Y ka d Flexity- und Combino-Dram - die alte,
aifach nie und nid uusenander halte.
Dr Underschiid kasch nur gschpyyre, das sag ych iine,
wenn si iiber Waiche faare - wo waicher sin als d Schiine!

Comité-Schnitzelbank Hanslimaa, Helge 2019

Dr Ueli Murrer sait ungeniert,
won er sy Drei-Milliarde-Gwinn präsentiert,
und vor Fraid wien e Chüngel ummehobblet,
„Guet halbiert - isch au verdobblet!“

Comité-Schnitzelbank Hanslimaa, Helge 2019

Bis zletscht han y bättet, ass unseri Siibesieche,
im Slalom und Riise emool Eerschte mieche.
Dasch machbar, wenn s wie bi de Fraue bassiert
und me d Laufzyt vom Hirscher vo Hand korrigiert!

Comité-Schnitzelbank Hanslimaa, Helge 2019

Wo dr Luther Martin afoot d Kirche spalte,
duet au dr Zwingli bi uns scharfi Predige halte,
glyy druff aabe döönts vom Schlachtfäld ööäää
und scho hets wiider - e Zircher weniger gää!

Comité-Schnitzelbank Hanslimaa, Helge 2019

Y  bi geege Pescht, Cholera und Droogehandel,
geege Dryybhuusschwindel und Klimawandel,
drum gib uns liebe Gott im Bundesroot oobe,
statt einere Martullo - lieber zwai Schwoobe!

Comité-Schnitzelbank Hanslimaa, Helge 2019

Wenn binere Kue dien d Hörner fääle,
git si weniger Milch, wel me si duet quääle.
Do maint ganz fräch son e  Buure-Gnilch
E Hund ooni Schwanz - git au kai Milch!

Comité-Schnitzelbank Hanslimaa, Helge 2019

Y ha no d BAZ und dr Daagesaazaiger abonniert,
doch y bi nur no an de Doodesaazaige intressiert
jetz liis y Doodesinserat däglig zwaimool in dr Zytig
und dr Film „Stirb zwaimool“ griegt en anderi Bidyttig!

Comité-Schnitzelbank Hanslimaa, Helge 2019

Y mach jetz au mit bi däm Klimawandel
und mischle mit im CO2-Ablasshandel.
Mit so Zertifikat verdien ych am maischte,
jetz kann y mir ändlig - en Ölhaizig laischte!

Anzahl Mitwirkende: 2
Comité-Bank seit 1979
hanslimaa@greenmail.ch