zurückzurück

Hansli Bargäld 2019

Comité-Schnitzelbank Hansli Bargäld, Helge 2019

Dr Frehner und dr Thüring, sin wie Digg und Doof
Der ainti git dr Giftzwärg, der ander dr dumm Goof.
Dasch glatti Unterhaltig, die sett sTheater nää
Denn würd vermutlig d‘Landschaft
au wider Subventione gää

Comité-Schnitzelbank Hansli Bargäld, Helge 2019

Mi Gottemeitli, s‘Vreni, das macht sich, s'isch e Bracht!
Goot scho uff e Haafe, e Windle bruuchts nur z'Nacht!
Es ka scho Mamme sage, d' Entwigglig isch famos!
Und näggscht Joor duets e Vordraag halte
am Wirtschafts-Forum in Davos!

Comité-Schnitzelbank Hansli Bargäld, Helge 2019

Dä Tesla-Schlitte- Super!, het blatz für drey mee Helm
Jetzt bruchtis no drey Hirni, denn fangtisch jede Schelm
Das Auti isch so clever, dass es mir d’Sprooch verschloot
und ersetzt bi de negschte Waale
Dr Baschi als Regierigsroot

Comité-Schnitzelbank Hansli Bargäld, Helge 2019

Doch es git Brobleem, das Auto loost gärn zue
Die Informatione, leen im Dateschutz kai Rue
S’wird alles iberdraage, was me im Tesla heert
doch bin i glaar dr Meinig
dass das Schnarche niemerts steert.

Comité-Schnitzelbank Hansli Bargäld, Helge 2019

Zer Ackermaa isch letschdi, e Mäldig ine gschneit,
Sie haig e Fääldritt gmacht, und syg uff d’Schnure gheit.
Sie miess e bitz pausiere, damit sie sich erhole mag;
He los, das isch für die doch,
E ganz normale Arbetsdaag.

Comité-Schnitzelbank Hansli Bargäld, Helge 2019

Die duali Bildig, isch hytt e Modewort,
studiersch im Hauptfach Mathe, machsch näbedra no Sport.
au am Prieschter-Semi, e Zwaitfach,-wenn de kasch-
und näbscht em Bibel-läse,
studiersch du au no Fuess-Massasch!

Comité-Schnitzelbank Hansli Bargäld, Helge 2019

Ych blan my Bruefskarriere, ich suech e Job mit Stil-
e Beroter glärt my ab: wo bi-n-i schwach, wo ha-n-i z'vyl?
Är macht e Analyse, denn seit är ganz subtil
bi dr BVB bisch richtig,
die hänn au kei Profil!

Comité-Schnitzelbank Hansli Bargäld, Helge 2019

Das Durenand bim Brexit, politisch sone Saich,
Ine oder use, das Gschwätz isch Birewaich.
Die Taggdig vo de Brite isch aim zwar guet bekannt
Ganz duss und doch derby si
Das kennt me au vo Baselland!

Comité-Schnitzelbank Hansli Bargäld, Helge 2019

Dä neui Trendsport Tschampe, isch jetze total in.
Sogar Nancy Pelosi, tschampt uffem Trump-olin
Ob Base-Tschamp oder Bungee, me springt und alles gafft
Und digg wär wenn au ändlig
Dr Wessels mol der Absprung schafft.

Comité-Schnitzelbank Hansli Bargäld, Helge 2019

Dä Helge do zaigt mi, in ebbe drissig Joor
I han e bitz mee Falte und nimme so viil Hoor
Ich schieb do mi Rollator, i lauf drum nimm so gschiggt
Doch bin i froh, will ändlig
sin alli BVB-Glais gfliggt.

Comité-Schnitzelbank Hansli Bargäld, Helge 2019

Ich stand mit minere Droone am Euro-Airport duss.
I loss se nur kurz stiege, mit Flugverkehr isch Schluss.
S‘CO2 isch gsunke, und d’Wärt sinn optimiert,
und ai Joor Warmluft-Ustoss
vom Gschwätz vom Wessels kompensiert.

Comité-Schnitzelbank Hansli Bargäld, Helge 2019

Das Baselbieter-Bashing, isch zuegää langsam faad
Dochs als Bänggler si z‘lo- Wär fascht ebitzli schaad!
Das isch halt so ne Gegend, wo ständig e Pointe bliet
Drum hei mir au kei Land so lieb,
Wie Euses Baselbiet, juhe
Drum hei mir au kei Land so lieb,
Wie Euses Baselbiet

Anzahl Mitwirkende: 5
Comité-Bank seit 2014