zurückzurück

Dreydaagsfliege 2019

Anzahl Mitwirkende: 3
Comité-Bank seit 2011

 

Comité-Schnitzelbank, Dreidaagsfliege Helge 2019

Das Logo vo dr Negro isch nimm wirgglig zytgemääs
Doch wenn das aine z saage draut do wird dr Bebbi rääs
Rassig gits e Solidariteetsdemonstration
Die drifft, wie's halt bi Gugge isch, nid ganz dr richtig Doon.

Comité-Schnitzelbank, Dreidaagsfliege Helge 2019

Am Morge deents im grosse Root "Rabää Rabää"
Dr Preesi maint dass das nid goot "Rabää Rabää"
Und links e Gschrei und rächts e Gschrei – e paradoxes Bild:
So lut wie d Lea Steinle het no sälte aini gstillt.

Comité-Schnitzelbank, Dreidaagsfliege Helge 2019

Kurz vor dr Wienacht wird dr hailig Babbe lyycht skurril:
Abtriibig syyg Mord und Schwuuli syyge pädophil.
Het er ächt z vyyl Mässwyy ghaa und lärmig Gloggeglytt
Oder hett s em in dr Kirche aifach no z vyyl Lyt?

Comité-Schnitzelbank, Dreidaagsfliege Helge 2019

Dr Preesi het d Frau Steinle samt em Buschi uusegstellt
Ych ha das z Östryych myyne Wiener Fründe grad verzellt.
"Bei uns im Parlament da geht das net, um Himmels Willen
Da muass die Muata da sein, zum den Bundeskanzler stillen."

Comité-Schnitzelbank, Dreidaagsfliege Helge 2019

Wie s Politiker mit "M" doch miseraabel goot
D May stoot vor em May-Day, s Mutti Merkel wirggt marod
Dr Maudet z Gänf isch maudit und e miggerig Persöönli
Und z Frankryych isch dä Macron beschtefalls no e Macröönli.

Ych gibs jo zue - ych sälber ha mi au scho loo verfiere
Im Internet ganz haimlig gwissi Sytte z konsultiere
Zerscht Softcore und denn Hardcore, jo - ych  gstand das mit däm Värs
Und denne gits no Glencore, aber das isch mir z pervärs.

Comité-Schnitzelbank, Dreidaagsfliege Helge 2019

D Frau Steinle hoggt im Groosse Root, e Buscheli am Buuse
Dä Aabligg jagt em Presidänt doch glatt dr Nuggi uuse
Derby basst sone Buschi gar nid schlächt in Root, persee:
es schlooft, macht Mischt und Knöpfli drugge duet s wie d SVP.

Comité-Schnitzelbank, Dreidaagsfliege Helge 2019

Ych find das glorios ass d Schieler jetz fürs Klima schwänze
Als Danggschön gits im Züügnis unentschuldigti Absänze
Wenns z Bärn im Palamänt drum goot das CO2 z begränze
Gits kaini Konsequänze fir die gaischtige Absänze.

Comité-Schnitzelbank, Dreidaagsfliege Helge 2019

Bi dr FDP het s Petra Gössi ganz versteggt
Uffs Mool - me froggt sich wo - e grieni DNA entdeggt
Die DNA erfillt bis zue de Waale iire Zwägg
Und denne spüelt me si mit soome Wasserfalle wägg.

Comité-Schnitzelbank, Dreidaagsfliege Helge 2019

Jeemer nai, jetz wänn doch die Emanze no in d Zünft
Do hänn die maischte Schlümpf in Zünft scho zünftig d Naase grümpft
Dr Burgener vom FCB het gmaint, iin wuurd das freue
Wenn d Fraue denn am Gryffemeeli d Tombola betreue.

Comité-Schnitzelbank, Dreidaagsfliege Helge 2019

Apropos dr Heer Burgener: Dä luegt dass ebbis lauft
Jetz het är sich doch grad dr FC Madras-Curry kauft
Är soll nur flissig aabegoo, das sterggt ganz sicher s Band
Dert isch är immerhin uff halbem Wääg ins Pfäfferland.

Comité-Schnitzelbank, Dreidaagsfliege Helge 2019

E Knoche vomne römische Kamel hänn d Archäologe
Im Spiegelhof bim Graabe letschti uss em Boode zooge
Dä Fund isch au us religiöser Sicht e Sensation
Jetzt wüsse mir: Dr Baschi isch e Reinkarnation.

Comité-Schnitzelbank, Dreidaagsfliege Helge 2019

Vo unsre Wärt do schwätzt dr Maurer zimmlig unbeschwärt
Wil uff em Märt do het dr Mehrwärt mee wärt als e Wärt
Bi bsunders wärte Gschäftsfrind losst me alli Wärt lo schliifere
So duet me fir dr näggscht Kashoggi d Knochesäägi liifere.