zurückzurück

Dräggspatze 2019

 

Anzahl Mitwirkende: 2
Comité-Bank seit 2015

 

 

dUmwältverschmutzig wird schiints als wie grösser
Bi mir isch’s halt suuber dank mim Laubblöser

I ha nid gärn Auti, wo sälber dien fahre
Wäm zeigsch denn dr Vogel in so n eme Karre?

Es überläbt kai Vogel mee im Drägg vo därä Wält
einsam flattre no zwei Adler übers Fuessballfäld

I spaar Energie, due öppis fürs Klima
Und iss nur no kalt - uf mim Flug nach China

Iich wott Küe mit Hörner – i bii doch kai Raudi
Und schigg die Knochesäägi de Saudi

dr Macron ka nümm in dr EU regiere
er muess zerscht no dehäim sini Gäälsucht uuskuriere

Dr Gross Root loot sich nid gärn vom Nochwuggs stööre
Dä isch um so luter jetz uf dr Stross z’hööre

Es bättet dr Bebbi: Herr, mach alles grien
Und lueg doch, dass dRoche-Aktie mitwaggse dien

dFrau Leuthard griegt ä n SMS, vom Baschi Dürr diggdiert
loos Doris, kasch is saage wie dä TESLA funggzioniert?

es het viel Schimpfis gää für dNegro Guggemuusig
Jä, ich verstand das nid: spiile die denn so gruusig?

I bii nid am Stille, mi Mundart, die goot
I glaub, i bi g’eignet für dr Gross Root

Wenn du emol gross bisch, sait dr Fisch zue sim Buschi
kunnsch ins Ozeanium und nid ins Suschi!

dKlimaerweermig het ä Vorteil, ä grosse:
me merkt jetz dr Sinn vo de löchrige Hose

denn bruucht im weermer gwordene Bâle
dFrau Ackermaa sicher nümm iire Schaal

s’Spital Bruederholz könntsch prima abrupfe
bi soo Temp’rature kriegt niemerds mee Schnupfe

ich dät mi im Klimanotstand brav fiege
und sicher ei Daag im Monet nid fliege

nach Zermatt dien si viil Handwärker hoole
well sMatterhorn miesst me jo denn wiss amoole

und niemerds mee kaa - und das gfallt doch alle
in ä Gletscherspalte falle