zurückzurück

Stächpalme 2018

Anzahl Mitwirkende: 3
Comité-Bank seit 2006

Staechpalme Fasnacht 2018

I bi bis hüt käi You Tube Star,
ha käi Community – so far.
I tröscht mi mit em Jesus, är isch au en arme Maa
und het wien ich am Afang nur grad zwölf Follower gha.

Staechpalme Fasnacht 2018

Käi Stäibock schläckts ewägg, käi Gäiss:
In den Alpen isch es häiss.
D Gletscher schmelze rääiewyys, d Laag isch tryscht bis schyter.
Do loob ich mir die bäide Basel: Doo goht d Yyszyt wyter.

Staechpalme Fasnacht 2018

Dass ich zum Wältkulturerb zell
und erscht no immateriell,
isch toll – doo non e Hiiwyys zur Erbouig vo de Gmieter:
D Helfti vo däm Erb si materielli Baselbieter.

Staechpalme Fasnacht 2018

Dr Wessels isch nach Rom ufbroche.
Worum? Är wird dört häilig gsproche!
Dr Papscht belohnt dr Hampe für sy chrischtlig Grundidee.
Die lutet jo syt je: geh isch seliger als neh.

Staechpalme Fasnacht 2018

Dr Lieschtler Stapi Lukas Ott
spiilt neu in Basel liebe Gott.
Drfür zieht d Achermaa uf Buus, wo si, no voll im Saft,
im Mai 2050 s Konzäpt fürs Schnapsmuseum schafft.

Staechpalme Fasnacht 2018

Im Wald, do balge sich zwee Kläffer,
e fäisse Fluumer und e Bäffer.
S isch klar, dass si dr Sinn vom Läbe blind begriffe häi:
Kläff lüter als dr Find und schiff em denn no gschwind ans Bäi.

Staechpalme Fasnacht 2018

S git läider nid meh AHV.
Was wird us mir und myner Frau?
I ha käi zwäiti, dritti Süüle, dir, mir droht dr Brexit.
Als letschti Süüle blybe nur no Cumulus und Exit.

Staechpalme Fasnacht 2018

Natürlisch isch aab Monsieur Fringer
nischt nur gewickelt um den Finger.
Isch aab gespuckt, geohrfeigt und mit Fäusten ihn traktiert,
doch weil isch bin für Fairplay, ihn nischt ganz exekutiert.

Staechpalme Fasnacht 2018

Dr Trump het gnueg vom Wysse Huus und wird neu Chef vo Twitter.
Dr Papscht hürotet d Lindsey Vonn und landet hinder Gitter.
D Merkel stalkt dr Macron znacht im Dusel vor em Huus.
D Queen kifft mit em Butler – ich ha voll dr Fake News Blues.

Staechpalme Fasnacht 2018

Jetz gohts em Santichlaus an Chraage.
Die alt Frau Niggli isch am Chlaage:
Är häig ere vor achtzig Johr, si häig das lang verdrängt,
won er se in Sack gsteckt häig, ans lingge Schiinbäi glängt.

Staechpalme Fasnacht 2018

Im Vollsuff torklet äin in d Chille.
Dr Pfarrer rieft: um Himmels Wille,
ich schick Sii, Monsieur Buttet, mit em Darbelley uf Lourdes,
au wenn lut Häiland d Häilig vo so Schyynhäilige duurt.