zurückzurück

Schnaabelwetzer 2018

Anzahl Mitwirkende: 3
Comité-Bank seit 1997
bis 2004 Fläädermyys
seit 2005 Schnaabelwetzer
schnaabelwetzer@bluewin.ch

 

 

 

 

 

Schnaabelwetzer Fasnacht 2018

Ans Fuudi länge, dööple, grapsche, fingerle us Glüscht –
Käi Wunder glaage d Fraue: D Männer länge au an d Brüscht!
Sogar d Frau Pegoraro glaagt – das hätte mir nie dänggt –
Sit Johre fühlt sy sich vom Läufel-Fingerli bedrängt!

Goht s dir verschisse, myys und schlächt und hesch e Riisetief?
Moralisch liggsch am Boode und s lauft alles numme schief?
Denn bau dy uff, dängg positiv – dur d Freud wird s Läbe glatt!
Dr Wessels freut sich uf die näggschti Bauschtell in dr Stadt!

Schnaabelwetzer Fasnacht 2018

«Bim Fringer goht s vyyl ringer», dänggt dr Monsieur Constantin
Und schmiirt däm äins ans Hirni – pas très gentil à la fin!
«Was mach y», dänggt dr Baschi, «wenn dä z Basel ummelauft?»
Und het für d Schuggerei sofort e Panzerwaage kauft!

Schnaabelwetzer Fasnacht 2018

Die z Lieschtel spaare numme – und mir Basler zahle druff.
Das sinn die letschte Batzeglemmer – hey, das macht ys muff.
Drumm freue mir uns still und häimlig: S kömme jo scho glyy
E Zug voll FCZ-Chaote z Prattele verbyy!

Schnaabelwetzer Fasnacht 2018

Franziska, Lisa, Monika, Jasmin und Annabelle,
Die glaage uf Beleschtigung, sit Johre – sexuell.
Jä, d Aaklaag, Sii, die isch brutal – juristisch duredänggt:
Dr Fritz häig ihne alls bim Mälche voll an d Zitze glänggt!

Schnaabelwetzer Fasnacht 2018

Us ryffe Pfluume brennt me Schnaps – dä Fuusel passt uns nit.
Doch s Destillaat uss Häidelbeeri – das isch unsre Hit.
Die mäischte Beeri ka me bruuche, süess und dunggelroot.
Doch s Cassisbeeri ohni Saft passt nur in Bundesroot.

Schnaabelwetzer Fasnacht 2018

Ych ha s nit glaubt: Jä, hundert Liter dringgt en Elefant.
Ych ha s em Zolli-Wärter gsäit – dä nimmt das ganz entspannt.
D Kamel – säit dä – die suffe meh, so vyyl, wie s numme goht.
Am beschte gseht me das bi däne uss em Grosse Root.

Schnaabelwetzer Fasnacht 2018

Hesch Osteochondritis? Und hesch Fuesspilz? Oder Gicht?
Mesaortitis dissecans? Prostata? Übergwicht?
Appendicitis chronica? Verdräisch käi Aspirin?
Gang frog dr Rotscher, dä isch jetz «Doggtor der Medizin»!

Schnaabelwetzer Fasnacht 2018

Politisch froggsch dy scho, ob äin bis 80 fahre darf.
Isch dä no fit und gäischtig zwääg? Und gseht är au no scharf?
Jä, wäiss dä no, wo d Kupplig isch? Und wie dr Blingger goht?
S kunnt nit druf a, will dä jo z Basel sowyso nur stoht.

Schnaabelwetzer Fasnacht 2018

Mit Dignitas und Exit ka me d Wält diskret verloo.
Und au s Hospiz hilft äim drbyy, ganz lyyslig äifach z goh.
Nit immer goht s so lyyslig zue, jä mänggmol git s Radau:
Gang numme mol uf Sissach und frog dört die tooti Sau!

Schnaabelwetzer Fasnacht 2018

E Château-neuf-du-Pape mit Johrgang nüünzähhundertzäh,
Dä hämmer us em Käller gholt, dä het me müesse näh.
Y ha dä eedli Saft ussgläärt – das isch denn öppis schwäärs –
My Frau het gsäit: E Zapfe mit zvyyl «Weinstein» isch pervärs!

E Rolls Royce, zwäi Ferrari und e Tesla für in d Stadt,
E 4x4 als Schüelertaxi – ryych syy isch scho glatt.
Wie d Maade läbe mir im Spägg, sin fornäm und mondän,
Und s Töllscht, Frau Herzog: S Schwarzgäld hän mir uf dr Isle of Man!