zurückzurück

Dootebainli 2018

Anzahl Mitwirkende: 4
Comité-Bank seit 2005

Dootebainli Fasnacht 2018

Es haisst in Baasel «d Boscht goot ab», grad Faasnacht buur
Daas deent fir uns nach Karneval, nid Wältkulduur.
Gliich isch es guet, me duet d Boscht uf d Blaggedde nää –
Denn waiss me weenigschtens, es het Mool aini gää.

Dootebainli Fasnacht 2018

Väärs yyber Ziircher syyge billig, haisst s vo Oobe
Und au Schwoobe deerfsch bim Bänggle nur no loobe.
Jetz bruucht s Ersatz fir die, wil d Lyt e Duubel wänn:
S isch scheen, dass Baaselbieter au e Uffgoob hänn.

Dootebainli Fasnacht 2018

Iir miend eych wäg NoBillag kai Angscht mache loo
Dr Määrt dä richtet daas, s git gueti Byspiil doo.
Dangg Inveschtore wiird e bessre Seerwis koo
Und daas kunnt guet, das isch jo bi dr BaZ au soo.

Dootebainli Fasnacht 2018

Wääred Taizé hänn baar Bsuecher bin is gschlooffe
Alles nätti – nur dr aint, e Katastrooffe!
E Franzoos, dä missioniert is: «Loos, au duu
Muesch Jeesus finde», no hänn miir gsait: «Taizé-vous!»

Dootebainli Fasnacht 2018

Dr Trump dä sitzt mol wiider zmitts im Schissistuurm
Do haisst s uf aimol, es brenni in sym Duurm!
Soo länggsch vo dyyne Luuge ab, wie me s scho kennt
S hänn bi eme soon e Breesi scho mol zwai Diirm brennt.

Dootebainli Fasnacht 2018

Dr Maxli dä kunnt us dr Schuel und maint ganz blaich:
«Du Mami, gäll das mit NoBillag isch e Saich!
Wil ooni Billag isch es faad, gäll, nid vergässe,
Stimmsch nai, i wott mi Wuurscht nid ooni Bommfritt ässe!»

Dootebainli Fasnacht 2018

Suechsch du im Baaselbiet e scheneroos Gidangge,
Kaasch weenigschtens fir d Hoochstammobschtbaim-Rettig dangge.
Au Bäärn isch schtolz, as es deert raari Frichtli git
Numme bim Cassis waisch – vo Hoochstämm kunnt dä nid.

Dootebainli Fasnacht 2018

Dr Macron giigelet nach e baar Gleesli Wyy:
Die Merkel luegi wien e suuri Guurgge dryy.
Si hätt au gäärn e Spruch wie «République en marche!»
Doch deert bassi eenter «Republik am Arsch».

Dootebainli Fasnacht 2018

Es losst dr Baschi Betongletzli aanestelle
Falls e Laschtwaage an Wienachtsmäärt hätt welle.
Nur eppis dunggt is glunge, daas mien mir scho saage:
As d Gletz geg Islamischte sälber Burka draage.

Dootebainli Fasnacht 2018

D Frau Meeriaa griegt vom Soon d Alexa bresentiert:
«Lueg, die stellt d Haizig uf Bifääl waarm, wenn s di friert,
Bstellt Ässe und lescht s Liecht», druf maint sii bitz verloore:
«Aber Bueb, das macht doch s Maaryy scho sit Joore!»

Dootebainli Fasnacht 2018

Wäg dääre Metzgede in Sissach git s ai Grach
S gaisslet sich e Pfaarer, haut sich ains uf s Dach
Dangg «Fifty Shades of Grey» isch s in, sich sälber z gweele
Lueg mol, was mir doo als Regierigsreet dien weele.

Dootebainli Fasnacht 2018

Es wirft dr Trump voll Wuet em glaine Kim an Kopf
Äär haig dr greesser und dr besser – Bombe-Gnopf
Suechsch als Bänggler noch me Väärs, verzwyyflisch draa
Wil me do d Wooret schlicht nimm yyberdrumpfe kaa.

Dä «Fire and Fury»-Schryyber het sy Buech uns gschänggt
Deert stoot, dr Trump dä spinni – hättet iir daas dänggt?
Mir lääse s ganze «Fire and Fury», bis ganz hinde
Und finde, as mer «Fast and Furious» besser finde.

Dootebainli Fasnacht 2018

Zum Abschluss saage mir eich jetze no ganz offe:
Joo, au Schnitzelbängg sinn vo metoo bedroffe!
Sinn iir schoggiert, duet eich das duurenanderbringe –
Was meinet iir, wiesoo die Zwai doo deerfe singe?

Glagsch mit #MeToo in Hollywood geg Grabscherbande
Haisst s, du syygisch dumm, du haigsch das falsch verstande.
Wottsch du au in dr Schwyz di geg so eppis weere,
Denn ergläärt me dir, die Dummhait kenn me leere.

Dr Thomas Kessler isch bikannt fir glaari Woort
S isch gliich zu weelem Thema: Schwätze isch sy Spoort.
Wil em halt s Rampeliecht fäält – händ er en scho gsee?
Macht är jetz d Drottwaaramsle vo dr FDP.

S git Wannacry-Attagge und Atoom-Gnopf-Waan,
#MeeToo, Meltdown, Weinstein, Trump und Erdogan,
Syrie, Rohyngia, Jeme – findisch nid au duu
Doo kaa me nur no saage: «Wannacry? Metoo!»

Hesch nid baar Allergie, bisch hit nimm drbyy
Gheersch eerscht drzue, hesch au e Dingsbums-Zwangs-Phobie.
Au uns goot s hyffig schlächt, jetz het dr Doggter gsait,
Mir lyyde schyynts an Mensche-Unverdräägligkait.

Unter #MeToo verzelle Stars nach Joore no
Wie me drunter mues, zem ganz nach Oobe koo.
Und bringsch es nid ganz uffe, denn dängg aifach draa:
S mecht jo dr Weinstein gäärn e zwaiti Chance haa.

Es duet dr Constantin am Matsch dr Fringer schloo,
Drum deerf är jetz e Wyyli nimm in s Stadion goo.
Doch d Karriere, die goot wyter fir dä Maa:
Dr Trump dä mecht en schyynts als Prässesprächer haa.

Unsri iPhone lauffe hitte alli nimm
Kai Mail, kai Whatsapp und kai Twitter, es isch schlimm.
Mir hänn sit gescht d Alexa wo s Huus kontrolliert
D Siri isch yyfersichtig und het alls blockiert.