zurückzurück

Anggewegglimaitli 2018

Anzahl Mitwirkende: 3
Comité-Bank seit 2008

Anggewegglimaitli Fasnacht 2018

D Fasnacht isch, sind uff der Huet,
Unesco-Wältkultuurerb-Guet.
Derby waiss niemer, i mach e Wett,
Was e Gugge mit Kultuur z due hett.

Anggewegglimaitli Fasnacht 2018

Aber Ziiri muess sich jetzt scheniere,
Wenn si ihre Böögg gremiere.
Das kaa, sait d Unesco, Kunz und Hinz.
Ziiri isch und blybt Brovinz.

Anggewegglimaitli Fasnacht 2018

D Frau Herzog hoggt in der Styyrverwaltig
Uff Myllioone, dasch gewaltig.
Bletzlig schreit si: «Aso dää drybt mir s z bunt!
S Gäld ewägg, der Wessels kunnt!»

Anggewegglimaitli Fasnacht 2018

Am Regg, do muess fir e gueti Noote,
D Kür und au der Abgang groote.
D Kür hett der Wessels scho versaut,
S blybt numme no, dass är n schleunigscht haut.

Anggewegglimaitli Fasnacht 2018

«My Pfyffli isch lenger», heersch Buebe saage.
«My Schlitte isch schnäller», mien Bursche sich jaage.
Wenn Männer das Spiil nit stobbe, wird s beeser,
Denn sait der Donald zem Kim: «My Adoomgnopf isch greesser!»

Anggewegglimaitli Fasnacht 2018

Fir e Tennisstund kan i jetzt, s isch esoo,
Zem Doggter Roger Federer goo.
Und d Rächnig, das duen i nit verbasse,
Die schigg i denn der Granggekasse.

Anggewegglimaitli Fasnacht 2018

Zem Junker sait d Leuthard: «Guete Maa,
Die Ains mit nyyn Null draa, die kasch haa.»
Ich gäbt däm lieber – ass är goht –
Die siibe Nulle vom Bundesroot.

Anggewegglimaitli Fasnacht 2018

Me hett s hit nimme lyycht as Frau,
Saag ich zem e Maa ganz lieb: «Ich au!»
No zitteret dää vor Angscht am Ranze
Und maint, ich syyg e «me too»-Emanze.

Anggewegglimaitli Fasnacht 2018

He Du dert mit der Unschuldsmyyne,
Du gnaissisch in my Usschnitt yyne!
Mi Aawalt kimmeret sich jetzt drumm,
Dasch sexuelli Beläschtigung!

Anggewegglimaitli Fasnacht 2018

S git Underschiid, so glaini fyyni,
Zwische Burka und Bikini.
Im Hidschab bin i en Anonyymi,
Im Dirndl waiss i: Das sin myyni!