zurückzurück

30 Joor Glettyse 2017

Anzahl Mitwirkende: 2
Comité-Bank seit 1985

Sitt Joore duet me s´Schwimmbad fille,
Mit Chlor-Gas-Wasser-Saifi-Gille.
Das ka am s Bade scho verhunze,
Mi gruust´s sogar, ins Wasser z´brunze.

Glette, glette , glette, glette,
Glette, glette , glette, glette.
Glette, glette , glette, glette,
Kai Pointe ka dä Värs no rette !

Wäg däm vyle Gift in unsrem Ässe,
Wär´s nit gscheyter, mir wurde d´Plastigg-Yykaufs-Gugge frässe ?
Ych glaub, dr Mensch, dä bruucht kai Maage
Dä bruucht im Ranze Kläranlaage

Sitt dr Fitness Expo dribbts my Frau als wie wilder
Sie isch jetzt au e Boddy-Builder
Jetz waiss ych ammigs nimm bim Schmuuse
Kiss ych s´Gsicht, s´Fiidle oder dr Buuse

Zem d Granggeköschte z glette mien sy folgendes due,
Löön sy um himmelswille iire Arzt in Rueh.
Nääbewirggig und Risike könne sy au vergässe,
Sy mien numme d Paggigsbylaag frässe !

S´hett uff jedem Päggli Zigarette,
Horrorbildli und e Warnhiiwiis, wo sell Läbe rette.
Hätt me s´glyych Prinzip fir Politiker ibernoo,
No kennt dr Baschi vor lutter Kläber kum no stoh !

Trotz Büstehalter, Silikon und vyl Gymnastigg,
Velofaare, Sex und au Aerobic.
Trotz Bostich, Kläber und Zemänt,
Stütze, Gips und biologische Fermänt.
Trotz Stretching, Creme und Aquavit,
Mieder, Kopfstand, Wonderbra und Araldit.
Trotz Waldläuf, Schlamm und Spritze,
Puder, Joga, Jogging, Ummelitze.
Trotz Massage, Knätte oder Höhesunne :
D´Schwerkraft hett no immer gwunne !

 

30 Joor Glettyse Adje Elite !
Liebs Comite - Liebs Publikum - Haissgeliebti Bänggler

Mir zwai nimm ganz junge Pränte
Saage-n-Adje und gehn jetzt ab in d´Ränte
Denn sitt 30 Jöörli gheere mir zwai Grytte
Lutt Aigelob vom Comite zer - Elite
So hett uns jeede Obmaa präggt
Uns als Wunderkinder pfläggt
Ych stuun : mir zwai Ur-Broleete
Als e Dail vo dr gsalbte Etepetete
D´Creme de la Creme, s Gäli vom Ai
Usserwählt, im Himmel dahai

Gottseidangg, liebs Comite, isch das fir Eych verby
Nie meh uns erdulde und ellai jetzt nur no edel sy
Mir wärde wider ohni Schuldgfühl Glepfer frässe
Und Maniere – wo mir nie ka hänn - wyterhin vergässe
Unsre Wurschtsalat statt Eyri Filet Mignions
Bier fir uns und Eych e Medoc uss Lion
Nie meh holprig raime im e Hort vo Alexandriner
Nie meh Triangel näbem Chroma-Concertiner
„TäTäTä“ basst nit zue ghobene Cantate-Tranche
E Schurz nit zem Cut mit „la Cravatte Blanche“
Mir Gorbse, bohre in dr Naase, furze
Ihr suffet Cüpli, mir wie allewyl e Kurze

Mir Schreege, mir Gruusige, mir Diräggte
Lehn Eych jetzt ellai im Hospiz vo de Pfläggte
Uns hetts Freud gmacht, Eych partout z´provoziere
Mir gehn, bevor mir s´Glatti uss em Aug verliere
30 Jöörli zämme Bänggle, das ka Eych und uns e kaine näh.
Danggerscheen an alli, Sali zämme und e letscht´s TÄTÄTÄ