zurückzurück

Fäärimaa 2017

Anzahl Mitwirkende: 2
Comité-Bank seit 1998

Im ene Bekennerschryybe hänn mir entnoh
sie wänn dr Rahme spränge oder spränge loh
wenn genau, das waiss me nit
also, lueget ihn aa, solang s ihn no gitt


Am Sylveschter hany abgmacht mit mym Schatz
sie verzichtet uff Schoggi – ych uff d BAZ
es isch nit ganz gerächt, wenn mir ehrlig sinn
sie muess e soo kämpfe und für mi isch es e Gwinn

 


Am Springrytte refusiert, das döönt eher makaber
vor em Hindernis so e schööne Vollbluet-Araber
wieso muess das bassiere, froggt sich dr Pfäärdefründ
also yych vermuet mittlerwyyle religiöösy Gründ

 


Es marschiert dört unde in dr Challenge-League
dr FC Züüry vo Sieg zue Sieg
uss Yyfersucht setzt GC alles draa
dass me bald in dr glyyche Liga spiele kaa


Ob GREXIT oder BREXIT, das erkenne die maischte
doo gohts drum, EUROPA Stäärbehilf z laischte
jä, waart nur, im Friehlig folgt s bööse Erwache
denn muess es EUROPA ohny dr FC Basel mache



In d Wäbergass kunnt mänggmool e Schugger, mänggmool e nätte
wo luegt - öbb die Dame dää gstrichlety Strich nit überdrätte
die Dame wüsse jo nit, wenn die Schugger soo gaffe
sinn die privat unterwäggs oder sinn sie am schaffe

 

Bi dr Masse-inländervorrangwanderygs-Initiative
oder Armeeumgstaltygsasylrächtsharmos-Alternative
und d Frau schreyt no lütter als d Kinder, derzue no dr Bruef verfäält
doo kaa s halt bassiere, dass me dr Baschi wäält

 


In Russland bikunnt jeedy Knilchin und jeede Knilch
sys Doping beraits mit dr Muettermilch
doo lehrt s Buscheli bim Stille – yych find das schlimm
ahaa, s Mami isch däa mit dr diefere Stimm

 


Y haa e Bolizeyauto mit Blauliecht fahre gsee
duur d Elsässerstrooss mit hundert oder no meh
an dr Krüzig hett äär grien – blybt aber stoh
doo hett äär miesse im Velokurier dr Vortritt loo

 



E Grossdail in Amerika macht e Freudegump
uss Üübermuet und Vorfreud uff dr Donald Trump
es wäär jo no guet, wenn die wüürde verstoh
das isch e Black Out, wo könnt e bitz länger goo

 



Lutt PISA-Stuudie syg das bi uns esoo
mir könne zwar lääse, hänn aber Mieh zum s verstoh
ych vermuet jetz, bi öbbe nüün von zää
hänn sie zum lääse d Basler Zyttyg gää

 



Bi däm Emmetaaler stuun yych numme
hett s jo um d Löcher soo weenig Kääs drum umme
falls me das esoo verglyyche kaa
isch dr Gotthard au nit besser draa