zurück

Zahnstocher 2005

 

Anzahl Mitwirkende: 3
Comité-Bank seit 1989

 

A propos BVB – vorusgsetzt ass sy fahre:
jetz bruuchts zur Not dr hinterletschti Gläbberkaare!
Drum wenn sy Billje kontrolliere an dr Düüre,
nimmsch allerhöggschtens dy Museumspass no füüre!

Do muesch di frooge: sinn das alles stark Verglemmti,
lycht Verdruggti oder aifach numme Ghemmti?
Mir hänn letscht Wuchenänd dr Schmid gfroggt, was är maini
zu unsrem Schyteam: … also Raser syges kaini!

Mir hänn ys biometrisch voll lo registriere,
lo Bluet und Fingerabdrügg digitalisiere.
Dr Zöllner luegt in Pass - so Date gänn Vertraue -
und merggt mit gschueltem Bligg: Aha - das synn drei Fraue!

Do letschti froggt so ain, wo sammlet, was mer fände
zum vyyle Sammle hüt und öb au miir no spände
für sy Winterhilfprojäggt "Ein Herz für Kinder"
für neui Wasserwärfer, Seil und Kabelbinder!

Jetz griegt d Regierig, Sii, do könne mir denn froh sy
e Breesidänt, wo nit regiert, wo nur muess do sy.
Ain, wo nüt anders mache ka als Reede schwinge,
do ka jo d DSP dr Tschudi wider bringe!

Am Bahnhof hätte uff dr scheene Passerelle
zwei Passante dringend Wasser löse selle.
Doch wer sucht, der findet höggschtens e baar Lääde -
Kunschtstügg hänn die praktisch däglig Wasserschäde!

Jungi Bischöff - um die siebzig - hänn beschlosse,
me sotti d Päpscht nit z lang am Sässel glääbe losse.
Als Gränze wänn sy 75 Johr empfähle -
derby darf z Rom jo ain ab denn sich erscht lo wähle!

Dr Morin dät schyynts in der Kirche non em Zmörgele
und non em Vollkornmiesli zäh Minute örgele.
Eso trainiert dä Ma dr Umgang – dasch z begryffe -
mit warmer Luft us vyyle grooss und glaine Pfyffe!

Das Gschyss ums Gäld vo däne vyyle Goldresärve
das goht ys langsam aber sicher sehr uff d Närve.
E goldig Ei, Frau Herzog, dien Sy überleege,
mien au Sii bevor Sy s koche zerscht no leege!

An sym Preesi-Fescht mit Gescht und Ehreweibel
gryfft dr Bush mit Cowboy-Bligg an d Holy Bible.
Ganz perpläx froggt näbedra sy holdi Schääse:
Jä Schorsch, de willsch doch jetz nit blötzlig lehre lääse!

Vers in eintöniger Weise nur gesprochen – ohne Gitarre!

Me darf hüt nur no mit Kamille in der Knille
wäg de Promille ganz im Stille d Lampe fille.
Falls Sii die Läsig do nit luschtig finde sotte,
sit gescht sinn rauche, schwimme, singe au verbotte!


Stohsch wie d Frau Fetz und miir im öffentlige Lääbe,
blybbt en Affaire mit so Spändegälder glääbe.
Dr Unterschiid zu ihre - dä isch lyycht z erklääre:
Mir bruuche kaini Spände – höggschtens en Affaire!

Vor dr Wiehnacht schöpft dr Nochber us em Volle:
Är kauft für d Lüüchtgirlande zerscht e Kabelrolle
und denn im Aldi z Lörrach – ihm ischt nicht ums Scherzen –
am ene Schnierli 25'000 Kerzen!
Denn vom Lidl mit Rabatt e Plastiktännli,
das macht uf Knopfdrugg mit zwei Escht grad au no s Männli.
Uf e Fänschtersims ins glaine griene Väsli
kunnt – me waiss jo nie – e goldigs Oschterhäsli!
Und wenns denn dussen im Advänt so komisch tschätteret,
will son e Plastik-Klaus grad d Huuswand uffeglätteret,
goot är ins Näscht, dört gäbs Brodäscht – zwor nur e fyyne:
jetz styyg dä Gummi-Santiglaus zum Fänschter yyne!
Au gsächsch im Wohnhus näbedra dr Max – dä schänggi
dr Frau grad Lüüchtstoffmandaryynli und die hänggi
das Züg im Garte sofort uff - jä nai - do lob er
doch sy Frau - die miech das pünggtlig im Oktober!