zurück

10 Joor Stroossewischer 2005

 

Anzahl Mitwirkende: 2
Comité-Bank seit 1996
stroossewischer@bluemail.ch

 

 

Au miir, mir sage s letscht mol aadiewool Herr Tschudi,
uff der woolverdienti Ruhestand fraisch Du Dy.
Hesch Zyt zem Bleeterle und ains, das kasch der spaare,
s Tamara Wernli nämmlig schrybbt der scho d Memoire!

Im Juschtyzdepartemänt do gheersch se wimmere,
der Guy well sich perseenlig um d Brobleemfäll kimmere!
Jetz suecht dä Doggter in den Aggte uff em Gricht,
vom Dieter Behring s Röntgenbild und d Granggegschicht.

„Ey hesch e Stutz, odr so, ey waisch für öbbis z Ässe,
ha grad e Loch, waisch, ha drum s Boortmenee vergässe.
Ey danggschöön gäll un no ne schööne, odr so!“
Dasch der Finanzminischter Merz inkognito.

Do reggt sich aini uff bim Billet uuseloo,
„Drei Stutz isch z vill vom Barfi bis an Pfaffeloo!“
Mer wisse gar nit, was das dumme Lyysi het,
denn fir die Streggi nimmt me hit doch Easy-Jet!

„Halt! Stop! Vercheerskontrolle! Jä wäit der soodo häi?
Käi Liecht am Schutzbläch! Das macht hundertfüffzig Stäi!“
Do rieft am Funk der Gysi Hans vo Rooteflue:
„Loos, lo se faare Fritz, mer häi für daas Joor gnue!“

Zeerscht Faltegreem und Puder, Rouge an d Bagge draa,
an d Augeliider Fliider, Liidstrich, Maskara,
z letscht roote Libbestift…
„Was mainsch? Sag, gfallt s der Schatz?“
„Jäjä, s isch guet esoo, de gseesch jetz us wie d BaZ.“

„Es isch so Drägg im Stadt, kasch luege alli Stroosse!
Kasch gar nit sitze Mann, mit wyssi Trainerhoosse!
Hey isch voll krass Mann, wie die Basler jetz dien schmutze!
Waisch, isch my Vatter, wo hüt ganzi Nacht muess butze!“

Im Altershaim zem Lamm do gseesch se flyssig baschtle,
sy dien an dünne Sperrholzbrättli ummeraschple.
Sy naaie Kisseli und fille se mit Speen,
em Staat kunnt s ginschtiger esoo, wenn sy denn geen!

„Es gfallt mer gaar net, dass der Chrischtian villicht goo will,
dass unsre Gross, der grosse Held uns gar verloo will!
Schon der Gedangge der macht mii komplett konfuus.
Ych stopf en uus und stell en dann in s Puppehuus!“

Daas Joor hän miir bim Schnaabelbryys e Wett abgää
und zwoor uff unsre Favorit der Striggetää.
Mer hän hoch gsetzt und welle uff e Schyyry zelle;
jetz het der Ogi unser Schmiirgäld doch nit welle!