zurück

Singvogel 2005

 

Anzahl Mitwirkende: 3
Comité-Bank seit 1997

 

Jetz git s e Migroskurs im Fach Orthografie.
S Tamara Wernli isch mit Lyyb und Seel derbyy.
Und si streggt uff wie wild, sii waiss es ganz elai:
Yych schrybt me gross, und alles andere schrybt me glai.

Y stand im neie Jäggi, Mittelstogg 4 b
zwische Kaländer, Kaffi, Games und DVD.
Y fluech: Y suech e Buech! Do sait dä jungi Maa:
Rächts drei Stögg d Stäägen uff hets geschter no ains gha.

Wo der Lehrer frogt, was 4 und 7 git,
do sait der Hansli: Sii, do bruuch ych aber Zyt!
Er paggt sy Laptop us und maint in coolem Doon:
Y glaub y machs als Powerpoint-Präsentation.

Es haig der Gotthälf schyynts, vom Färnseh nit bifuegt,
als Daagesgascht im Sahlewaidli yynegluegt.
Äär bitrachtet schwyygend das Brimborium;
denn goht er zrugg ins Graab und drayt sich deerten um.

Mit däre BVB do het der Lewin Quaale.
Er mecht die Plaite-, Päch- und Panne-Filiaale
jetz in d Persooneschifffahrtsgsellschaft integriere
und in de Drämmli au no Rettigsring montiere.

Es sait der Blocher während em Znacht ze syyner Blochere,
won äär im Wuurschtsalat garniert duet ummestochere:
In mym Departemänt entloss yych dääglig zwai;
bald han y s gschafft, denn bin y ändlig ganz elai!

S dien unseri Skirennfahrer, so wie die dien schlyche,
im Effiziänzgrad ammene B-Poscht-Päggli glyyche:
Bim Start do gläbbt men en e Strichcode druff als Zaiche,
zem se go sueche, falls si s Zyyl denn nit erraiche.

Damit me d Fasnacht ryybigslos ka duurefiehre,
isch s Polizeidepartemänt am Disponiere:
Me losst zer Sicherhait am Määntig vor de Viere
im Bahnhof Augscht der Ziircher Äxtrazug blockiere.

Si ziehn mit Gschrei, mit Lyychtpedarde und mit Fähne
in d Schlacht vo Ziiri, so wie doomools z Sämpach ääne.
Doch drotz de Goal vo Rossi, Huggel, Carignano
schyynt mir s Ergäbnis eenter so wie z Marignano.

Nachdäm der Chefchirurg im Färnsehstudio A
insgesamt zäh Kilo Fätt het abgsuggt gha,
schiggt me das Material per Lift ins Studio 8,
denn offebar wird deert e Kochsändig gmacht.

Jetz stelle Sii sich emoll vor – y due nur spasse –
d Frau Zanolari schaff im Migros an der Kasse,
si hätt e Kopfduech aa, jä Sii, jetz kunnt s Perfyyde:
Do wurde Sii doch sicher au dä Migros myyde.

Ob s miir denn gfallt im Sarg, das kümmeret mii hit nooni,
sygs Aiche, Sperrholz, Bambus oder Mahagoni.
Doch hätt y schandbar gärn, zem dääglig aimool schmunzle,
e Schlitz fir d Basler Zytig und e Taschepfunzle.

Noo de Wahle, bi däm Grubbebild fir d BaZ,
stoht der Morin s erscht Mool scho am falsche Platz.
Hejoo, wie soll dä wisse, won er gnau muess stoh?
Der Tschudi het jo gar kai Lugge hinterloh.