zurück

Schuuflebuur 2005

 

Anzahl Mitwirkende: 5
Comité-Bank seit 2000

 

Wottsch ainsam syy, hauschs ab uff d Insle,
oder goosch in d Toscana in e Glooschter go “pinsle”,
kasch au uff Dubai go “ajurväädele“...
Ych ?... ych gang in d Clarastrooss go läädele.

Buurereegle:
Wär sait „die Wüste lebt“ soll - los ! -
en Oobe lang in d Clarastross...


Im Saalewaidli mien si s Fuudi mit Heu go butze
und d Fingerneegel mit em Beil uff em Spaltstogg stutze.
Pletzlig heersch wie ain im Kuehstall schreyt:
“Ouh Shit ... jetz isch mer s Handy in d Gille gheyt.”

Buurereegle:
Kräht das Handy auf dem Mischt,
dann waischt Du sofort wo es ischt...


Das Nordisch-Walking isch e Hit,
doo mach ych mit Begaischterig mit.
Nimmsch sauschnäll ab, das isch kai Froog,
muesch aifach mit de Stögg uff d Woog.

Buurereegle:
Mit so Walking-Stögg wird demonstriert,
wiene Zwaibainer zem Vierbainer zrugg mutiert.


Der Maier glopft an d Himmelsdiire,
do rieft der Petrus hindefiire:
„Mein lieber Schwan, das Door blyybt zue,
butz zerscht s Säägmääl ab de Schue!“

Buurereegle:
Stupft im Sarg no s Säägmääl dii
denn waisch, de bisch nur schyyndoot gsii.

Z Paris schifft soone “Kinschtler” der Blocher aa,
das het der Blocher no logger wägsteggt ghaa.
S ainzig, won en wirgglig steert,
ass är jetz au zue de “Verschiffte” gheert.

Buurereegle:
Kräht der Blocher im Albisgietli,
lipft der Ueli Maurer s Hietli.


”Was hänn e Combino und d Zanolari
mitenander gemainsam?” froggt d Marie der Kari.
„Es mache baidi e saumässige Grach
und s gilt fir baidi: s Dach isch z schwach!“

Buurereegle:
Isch s Dach vyyl z schwach, denn kasch druff zelle,
gits z Basel druus e Passerelle


„S git au en Unterschiid” maint der Kari zer Marie
“zwischem Combino und der Zanolari:
Am Combino kasch notfalls no ummeboore,
bi der Zanolari isch Hopfe und Malz verloore.

” Buurereegle:
Man merke: Besser z spoot als nie
ass me soo Niete uus em Verkeer muess zie!


S Gschäft vom Behring lauft und lauft,
s hänn alli laufend kauft und kauft,
är lauft scho fascht als Ehredoggter,
nur jetz grad lauft är nimm - jetz hoggt er.

Buurereegle:
Dä hoggt jetz z Bärn, und das nit z gnabb...
im Wooghof wär dä lengschtens ab.