zurück

Schooffsuuri 2005

 

Anzahl Mitwirkende: 3
Comité-Bank seit 1992
- 1 Jahr als 'Ziggelfritze'
- 1993 bis 2000 'Seeleweermer'
- seit 2000 'Schooffsuuri'

 

Zerscht d Lämpe-Combino – denn dä nääbe de Glais,
Die Schwarte us Bärn und dr Trolleybus-Mais.
Denn s Fyyr in däm Depot und s ÖVG-Buff,
- und jetzt die Blagette – jä heert das nie uff ?

Hoggsch griehrt im Casino und bisch ganz erbaut,
No wir dr s Konzäärt vo de Drämmli versaut.
Jetzt hoffi ass d Hadid, die persischi Fee,
S Dram wurd als fliegendi Deppig vorsee .

Dr Schampe mi Frind – wo sunsch gar nyt vergisst,
Isch un‘gsinnt nimm umme – är gilt als vermisst.
Am Mittwuch do driff en - froog : was soll dä Quatsch ?
Do maint är, är syyg nur in Ziiri an Matsch.

Dr Kernen fliegt uuse - dr Cuche hauts uf d Schnuure,
dr Defago rast grad dur e Abschranggig duure.
I gib eych e Root, und denn erscht no e gsunde :
Macheds wie d Swiss und blyybed grad dunde !

S nei Layout syg s Greeschte, hett d BaZ ummeblefft,
Drby seet si uss wie ne Mickey-Mouse Heft.
Khunnt d NZZ-Basel - wärs nimmi so öd,
Elai mit dr BaZ mainsch - mir syge so bleed .

I ha aafoo sammle, die Maargge us Holz
Ha zwaihundertfuffzig und bi richtig stolz.
Jetzt ha si verkaufft, und finds nit esoo schlimm,
Dr Staatssaarg isch gratis – jetzt bruuch i si nim.
Au hit no heersch ebbe, es wurdi ain geert,
Wo Juude hett gholfe, obwohl sich s nit gheert.
Bym Asylwääse dängg i – kunnt nie mee e Zyt,
Wo me Basel derwääge so Eerige git .

Promille sinn jetzt gfalle – s verdrait badänt nyt,
D Schmier macht scho Lämpe – wenns Clausthaler git.
Au z Bärn fallt dr IQ jetzt scho uf Promille,
Sunscht wär me bim Hirschhorn doch muggsmyyslistill.

Dr Bush hett e Schleegli – meer kaas jo nit gää
Dr Cheney e Hirnschlag – nur blybbt ys au dä.
Jetzt wär doch z erwarte, was Schleegli betrifft,
As die won en gweelt hänn au alli ain drifft.

Worum mache d Ziircher e sone gross Gschrei ?
E Fluugplatz bringt Lärme - isch das ebbe nei ?
Bi uns ischs glaar greeglet - e suuberi Sach :
Mir hänn dr Fluugplatz - und Allschwil dr Grach !

D Uni mues spaare – und zwor iiberall,
S nei Deschtamänt lehrsch jetzt gly im e Stall.
Dr Räggter - dä Gäbler - sott jetzt verstoo,
As är - zwor mit Gott – aber aifach mues goo.

Dr Moshammer säälig – das Mode-Genie,
Laadt zem Lyychemeeli fascht nur Clochard y.
Do hani am Behring syni Glaibiger dänggt
Nur hätte die vierhundert Blätz gar nie glänggt.

Dr Wolf dä frisst Gryyde – mir wisse fir was,
Worum frisst dr Maurer statt Gryyde denn Graas ?
Si Soon wurdis rauche – zem Gligg - gottseidangg !
Denn isch doch dä Soon noni ganz eso grangg.