zurück

Schnaabelwetzer 2005

 

Anzahl Mitwirkende: 3
Comité-Bank seit 1997
bis 2004 Fläädermyys
seit 2005 Schnaabelwetzer

 

Dr Bärger, dr Hueber und au d Frau Straich,
die finde, die neyi BaZ isch e Saich.
Drfiir gfallt s Blettli em Babbe Gschwind,
dä kaa syt drei Joohr kuum no lääse und isch faarbeblind.

Dr Eymaa tobt und dr Schild reggt sich uff;
dr Conti steehnt, Rot-Grien haig e Buff.
Scho sinn die drey uf hundertzää -
das gfallt em Doggter Morin - jetzt isch Zytt zem Bluetdrugg nääh.

Em Fritzli sy Mamme phaggt s Ruggseggli yy:
Zwai Riebli, drey Biire, au s Lätzli kunnt dryy.
Eso blyybt dr Fritzli sicher gsund,
wenn är in Ziri statt an GC-Matsch in d Kischte kunnt.

Mir hänn ys e Bärnhardiner kaufft,
dä drottet und zottled und bällt, wenn er laufft.
In aim isch dä Dolpatsch unerraicht:
S isch puuri Kunscht, wie dä ans Gaartedoor vom Blocher saicht!

In d EU mien mir Schwyzer doch nie!
De kasch im aigne Bode alles zie.
Jä, das findet d SVP dr Hit,
sogar dr Ueli Murer pflanzt im Garte aigne Shit.

S isch unsre Zahnarzt in d Spinnwindi koo,
dä kaa das psychisch nimm duureschtoo.
Är het bim Schaffe Ängscht bikoo,
s kennt ihm jo glyych wie sällem Zebrahängscht im Zolli goo.

In dr Freye Stroos foosch im Lauffschritt aa,
im volle Spurt kunnt dr Aeschegraabe draa.
Vor em Baanhof hesch no s Letschti gää.
Denn rennsch uff d Basserelle, wo de kasch e Duschi nää.

Dr Schubarth het gspeyyt, jetzt leert är guets Binää,
leert Danggscheen saage, au d Hand richtig gää.
Am Schluss vom Kurs git s d Note drey:
Dä Depp het gsait zu däm, wo vor ihm stoot: I bi so Frey!

Es muess yyskalt wie z Sybyyrie syy,
bis z Baasel s Wasser yygfriert im Rhy.
Bis d Aare z Bäärn yygfriert im Bett,
hejo, do längt s, dass unsre Bundesroot e Sitzig het!

Sy hänn dr Saal vom Regierigsroot
total saniert bis in d Nacht yyne spoot.
Computer, Bildschirm, Stiel und Disch -;
Nur sälle Deppig hänn sy gloo - will deert dr Filz drinn isch.

2'890 Gramm
3'280 Gramm
Bim dritte sinns no zää Gramm meh:
Dasch d Zircher Fahndigs-Lischte vo de Fääns vom FCB.

D Frau Zanolari wär z Bäärn sooo gäärn
im Nationalroot dr SVP-Stäärn.
Doch jetzt will si nimm, fascht iiber Nacht,
he, will me neyerdings in Bäärn au Jagd uff Graaie macht.