zurück

Peperoni 2005

 

Anzahl Mitwirkende: 3
Comité-Bank seit 1988

 

Sali zämme, jetzt bin y do,
vom Saaleweidli obenaabekoo.
Gott hälf mer, y gang nimme zrugg, y will doch nur my Rue,
dä Hobby-Buur wott mer and Wesch, und die ganzi Schwyz luegt zue!

Ai Schlugg Wy, scho hesch e Buess.
Do git's nur ains: geen Si z'Fuess!
Speziell au an der Fasnacht empfääl ych s'Laufen Iine,
denn s'Drämmli kenne Si vergässe: das stoot jo "näb de Schiine..."

Wenn ain mit hundertachzig Sache,
duur d'Gegend raast, wie nit ganz bache,
ooni Ruggsicht uf Verluscht, will er uf sy Freihait pocht,
no muess das no kai Raaser syy - s kennt Aine syy wo blocht...

Em Moritz Sutter sy Hello-Air
syyg billig-air - bhauptet er!
Und fir so Fiirz wie Sicherhait und settige Fiirlifanz,
hänggt nääbem Kompass us der Pfadizyt - zer Not e Roosegranz.

Zerscht han y dänggt: mit Spott und Hoon
zien y iber das Zircher Stadion.
Do kennt y doch in volle Ziige schaadefraidig schwelge ...
doch iber Dummhait mool y - us Prinzip - nit emool e Helge!

Mit so Däsche zaige miir Fraue,
wohäär mer sin und uf was mer baue.
Zue dämm Modäll do mit em Schwyzerkrytz verroot ych iine jetz:
wenn's don e hooli Hand drinn het, no geert die der Frau Fetz.

No der Miss Schweiz, Miss Schwanger, Miss Ranzewee…
Wäärs an der Zyt fir e Miss SVP!
Do mäldet sich d'Angelika, wie letschte Heerbscht zer Waal,
und gwinnt der Dittel: "Miss-Erfolg" .. isch das nit genial?

Wo d BaZ, no sälber im Wuchebett,
mit Sebdämber-Buscheli gworbe het,
isch au der Sepp do Babbe worde, und uf das Kind kasch denn zelle!
S'isch eerscht Aafangs Oggdober koo: in die Zyitig het's nit welle...

Im Staatssarg kasch nimm gidiige liige,
de wirrsch uf Speen und Säägmääl byyge.
So eppis isch doch unbequääm, was mainsch, wie das duet bysse,
und wenn di denne gratze wotsch, fangsch garantiert e Sprysse.

Die rooti Eva fir d'Finanze,
eerlig gsait: "das bruucht e Ranze!"
Dasch s'Glyche wie wenn - ooni Noot - in der Hoffnig si däät's bringe,
d'Nella Martinetti wuurd fir d Schwyz go Schanzespringe.

Y bi dur e Baanhof gloffe,
und uf der Passerelle fascht versoffe.
Im Grund gnoo isch mir das egaal – s'git Schlimmers do uf Ärde:
me kennt jo au als Kunschtobjäggt vom Hirschhorn aagsaicht wäärde...

An der Fasnacht – das Joor im Hornig,
do sorge mir z'Basel denn sälber fir Ornig!
D'Zircher, wo im Äxtraazuug, wän koo zem Ummelungere,
stelle mer z'Muttenz uf e Stumpeglais und leen si dert verhungere.

Wend epperem eppis Guets hesch doo,
no kaasch der "schappo-Bryys" bikoo!
Au unsere Frind, der Ha-Ma-Tschu, stellt daas unter Bewyys:
er nimmt der Huet - het "schappo" gsait ...und wartet uf e Bryys.