zurück

Penetrante 2005

 

Anzahl Mitwirkende: 4
Comité-Bank seit 1997

 

 

Noo däm Metzler Buech isch s glaar, us unsrer Sicht,
die isch wie d Bahnhofspassarelle, nit ganz dicht.
Der ainzig Unterschiid, das isch e ganz e Digge,
unsri Passarelle kaa me wiider fligge.

D Basler Schuele dien e Jeede witer bringe,
im Ussdruggsdanz, in Döpferei und au bim Singe.
Und wenn der Eymann si Konzäpt duet wyyter dryybe,
kenne d Basler Maturante bald no schriibe

Em Pabscht si Mannschaft dribbt s im Ghaime immer wieschter.
Us em Verkeer ziet äär die sexbesässne Prieschter.
Ob Kardinal ob Mönch, wäär schwuul isch fliegt, s kunnt jeede draa
und mit de letschte Drei foot äär denn ganz nei a.

Mir hänn im Baudep regglamiert: „Es macht is muff.
Entsorged d Abfallsegg, s isch in der Stadt ai Buff.“
Dää sait, s sin kaini Bebbisegg, es däät iim wirglig laid,
das siige Basler Drämmler in däm neie Glaid.

I gspyyr Di gar nit so wie Du das mir jetz saisch.
Das mues ich zeerscht verschaffe - s isch mir wichtig – waisch.
I mechti wirglig, dass Du Dii so gää kasch, wie Du bisch.
Das isch d Regierig wo sich nei am finde n isch.

Der Islam sait – d Männer derfe iiri Fraue,
wenn si gar nit folge, zwischeduure haue.
Do maint der Hasan im Groosroot und au der Mustafa,
jetz sueche mir fir d Zanolari au e Maa.

So weenig spiile schloot em Hakan uff e Maage.
Galatasaray ka n äär no gar nit richtig saage.
Mir hänn in gfroggt, was äär im Ussland ummegumpi,
d Fiirweer Flüh die suechi nämmlig no ne Pumpi.

Wenn s Babsi Schneider als duet bätte jeede n Oobe,
fir alli Dierli, Mentsche, schiint s sogar fir d Schwoobe
und dass die Zollfreistross nie kunnt – derbi wär das e Gnuss,
uff dääre wääre d Schwoobe schnäller wieder duss.

Im Roothuus duet der Lewin voller Stolz verkinde,
d Rezession, das wiss äär gnau, sig am verschwinde.
Am Kiosk do haig äär geschter grad zwai Kunde gsee
und im Vergliich zu Vorgescht sig das aine mee.

Es macht der Hirschhorn uff e Blocher-Bild e Brunne.
Der Monsieur Couchepin findet s iiberhaupt nit gschpunne.
Äär wurdi sälber gärn uff so ne Fotti saiche,
doch in sim Alter isch es schwiirig mit em Braiche

Afrikaner, Türke, Yugos, Abesiine,
s PMD in Basel losst e jeede n iine.
Wenn die e Schtell frei hänn wurd aine zur Verfiegig schtoo,
unsre Zubi duet au jeede n iine loo.

Der glaini Fritzli duet de Ziircher Schugger schriibe,
äär haig doch nie soo lang in Ziiri welle bliibe.
Die wuurde s näggscht mool gscheiter d Fuesballmannschaft schnappe
denn kriege d Ziircher aimool weeniger uff d Kappe