zurück

10 Joor Passe-vite 2005

 

Anzahl Mitwirkende: 2
Comité-Bank seit 1996

 

Dr BAZ-Kultuur-Dail git au zimmli z reede.
S isch nit nur s Format, wo me driiber kaa schneede.
Für my Hamschter isch dr Inhalt no grad adäquat.
Wäge däm hets no lang nit – Wältformat.

Mir sait ain: Mach dä Flägge wägg!
I glaub es isch e Fliegedrägg!
Jä, wart, mit ere Luppe gseen mers glyy.
S kennt au die ney Blagette syy.

Schyynts, gits in der Schwyz nur Schyynasilante
und Schyyninvalyydi und die schyynbar Verwandte.
Em Blocher si Leesig – subtil wie Watte:
Ab ins Asyl - uff die Schyynigi Platte!

Ich gsee wäge mynre Rot/Grien-Verschiebig,
im Wald bim Jogge - amme nummen e Driebig.
Bi dr Zollfreystrooss usse kumm i völlig in Noot.
Denn vor lutter grien – gseen i numme no root.

Und d Frau Zanolari isch no dümmer draa.
Die kaa gar kai Rot/Grien-Verschiebig haa.
Die isch geege so Tügge völlig immuun.
Denn linggs gseet si nyt – und rächts numme bruun.

Au politisch het Basel über Nacht
e Rot/Grien-Verschiebig duuregmacht.
Jetz regiere die vier - vo de Liebe und Nätte
geege Uff-Rächti drey - wo vier Joor mien bätte.

Uff 600 Fäns wird ummeghaggt,
si wärde verhaftet und als Päggli verpaggt.
S isch s erschte Mool, dass e soone Horde
vo Zircher ächt isch gfesslet worde.

E Brunne im Bahnhof SBB,
dä koschtet zwai Frangge - oder no mee.
Das isch doch Wuecher, wenns mi betrifft,
dos in dr Passerelle jo gratis schifft.

Im Määrli schisst dr Eesel Daaler.
Doch Eesel sin hitte vyyl brutaaler.
Bim Beering byschbiilswyys – do gisch!
Erscht denn waisch, wär dr Eesel isch.

Fir Baidi han i d Düüme druggt.
Ha ghofft, ha bättet, dreymool gschluggt.
Denn wirds mer glaar – es isch fir d Katz!
- Aadie Tschuudi, Aadie BAZ.

Jetzt achtig, wenn er haim geend znacht:
S isch 0.5 – nimm 0.8.
Und agnoo, er sitzet morn no doo,
mien er d Lääbere ney aiche loo.