zurück

Hanslimaa 2005

 

Anzahl Mitwirkende: 2
Comité-Bank seit 1979
hanslimaa@greenmail.ch

 

Wel si kai Arbed findet, will mi Frau - die Cheese,
umsverwoorge go grampfe bi de Chinese,
doch syt d Absaag koo isch, us em Ryych vo dr Mitti,
han y dehai halt wiider - Sex and the City!

Kirche vo usse, Bäärge vo unde und Baize vo inne,
beachtisch die Reegle no foosch nie aa spinne.
Jetz gits non e neii Reegle ooni Quatsch,
gang nie immen Äxdrazuug an e Match!

Zem s Klima uffhaize und ass mer s Oel lenger längt,
han y e Aierkocher à la Ogi - an d Fassade ghänggt,
d Temperaturdifferänz isch jetz glainer - han y gmässe,
mit em Noodail, ass y jetz immer muess Spiegelaier ässe!

Y zaig Iine - my Spaar-Erfindig - voller Stolz,
e Staats-Sarg zem ässe, uus Läggerliholz.
S isch als Notportion dänggt, wenn in dr Kischte ligsch,
falls nit scho voorhäär - im Säägmääl verstiggsch!

Däm, wo in d Schlitz isch go Lyym yynedrugge,
ass d Billjeeautomate kai Gäld mee schlugge,
het dr Richter gsait, är griegt nur bedingt,
wenn er s Glyyche bi dr Zanolari fertig bringt!

Will ain Rooti gsee, no stoot er unter en SP Faane,
will ain Blaui gsee, no ligt er bi dr FDP aane.
will ain Schwarzi aaluege, no kaasch en bi dr CVP gsee
und wenn ych Bruuni will gsee gang y in s Eglisee!

Friener hän d Määrt-Fraue - ämmel fascht alli,
so Kopfdiecher drait wie d Geierwally.
Hit lääbe die, wo so Limpe draage vom Gucci,
vo dr Aarbetsloose und s Gäld isch futschy!

Ass z Basel nit nur no Grufti und Komposti residiere,
mien mer d Weier go butze, ass d Frösch nit krepiere
no gits au wiider vyyl mee Störch maint my Frau,
die bringe denn d Buschi und so rette mer d AHV!

In Uri, Schwyz und Underhoose,
dien si enand ins Alphoorn bloose.
In Ziiri herrscht e ganz andere Doon:
„O bloos du mir in s Stadion!“

Vor 100 Joor het dr Einstein e Theorie uusegloo,
ass effektiv d Zyt relativ schnäll duet vergoo.
He jo: Vom Schaffe bin y mit em Velo - relativ schnäll dehai,
wel y effektiv scho gange bii - z Midaag am zwai!

Zaichne Si au Hanslimaa-Financial-Fonds?
Mit 100 Brozänt Behring-Rendite à Diskretion!
S Kapital han y vo mim Cousin und dää hets vo sim Soon
und dä schafft scho lang - bi dr Finanzkommission!

Ass es nit haisst, si haige sich in d EU gschliche,
hän d Dürgge bi iirer Lira 6 Nuller gstriche,
stryychte miir in dr Schwyz 6 Nuller ans Bai,
no wär d Calmy-Rey - in Bärn elai