zurück

20 Joor Gluggersegg 2005

 

Anzahl Mitwirkende: 3
Comité-Bank seit 1986
Gluggersegg@gmx.ch

 

Melodie: Amazing Grace ...
Miir sinn nit uus Amerika, daas mergge sii scho glyy.
Miir sinn nur drey Generika ... vo Basel an mym Rhy.

Melodie: The house of the rising sun ...
Im Zolli git s e-n-Affegschrey, daas Niilpfäärd syyg verruggt,
ääs haig zem Zvieri ganz ellai e Zebrahängscht verschluggt.
Daas isch esoo uff dääre Wält, maint s Niilpfäärd zimmlig cool,
hit iiberläbt doch numme no dää mit em greeschte Muul.

Melodie: Oh my darling Clementine ...
An dr Wiise, uff dr Matte,
stooht e-n-Indianerzält.
S luegt ain uuse mit em Fäärnroohr,
in die haili Auewält.

Suecht im Zwyliecht noo Libälle,
s kennt au Ungeziifer syy.
Und uff aimool, hool s dr Banggroot,
fetzt "Pro Facile" verbyy.

Melodie: On top of Old Smokey ...
Me wäählt Herzog und Morin
und dääne het s glängt,
wil jeede an Herzog
und De Meuron dänggt.

Melodie: Michael row the boat ashore ...
Alli Siibe sinn im Boot. Hallelujah.
Mike ... wiird nit Regierigsroot. Hallelujah!

Melodie: This land is your land ...
D Prääriehind hyyle
um d Betonsyyle,
dr Sand duet gniirsche,
wenn miir deert piirsche.
Daas Land gheert alle,
uns wuurd daas gfalle
High-Noon uff dr Eerlematt.

Melodie: Der wilde, wilde Westen ...
Dr wildi, wildi Weschte fooht scho voor em Hardduurm aa,
im Äxtrazuug zem GC-Match kunnsch root-blau druurig draa.
Jä, si sperre sogaar Kinder yy und bruuche Dräänegaas
und daas erinnered aim doch ... si wisse scho an waas.

Melodie: Yellow rose of Texas ...
Dr Bush schwätz gäärn vom Friide und äär wiird derbyy nit root,
wil äär halt under Friide gaar nit s Glyych wie miir verstoht.
Dr Pabscht schwätzt au vom Friide und wil äär sy Biible kennt,
waiss äär gnau wie-n-e Busch bym Moses in dr Wieschti brennt.

Melodie: Es hängt ein Pferdehalfter an der Wand ...
D Frau Zanolari bsuecht kai Match vom FCB.
Si kaa die viile Fremde-n-uff em Blatz nimm gseeh.
Und wenn ain Schwyzer isch, sait ys dää satti Fääger,
denn syyg dää punggto Zahldaag sicher no dr Nääger.

Melodie: Good night ladies ...
Thun isch scheen, nichts tun scheener
Nichts tun geege Thun, isch am scheenschte.
o-jeh, o-jeh, o-jeh, o-jeh.

Melodie: Ich möcht' so gern Dave Dudley hör'n ...
Dr Hakan het Dave Dudley gloost und druggt uff s Gaaspedaal.
Jetzt fählt em au sy Faahruuswyys, dää bruuchts nit z Ischtambâle.

Melodie: Oh lonesome me ...
Kiirzlig, woo d Frau Muurer Kiirbissubbe kocht,
het dr Ueli uus em Gaarte Gryttli brocht.
Doo huucht sy Schätzli aatöörnt uus em Dampf:
Duu, daas isch Hamf!

Melodie: Siebentausend Rinder ...
Siibehundert Fläsche
verschänggt die Blauderdäsche.
Schubi-dubi-duu.
Fläsche läär, Fläsche gooht, HaMaTschu.

Melodie: Siibe kuugelerundi Söi ...
Dr Waagefiehrer Haiggi Hayer
singt voll Inbrunscht in sym Zwaier
e Schlaager woo glyy jeede kennt:
S Depot brennt! S Depot brennt!