zurück

Gardischte 2005

 

Anzahl Mitwirkende: 3
Comité-Bank seit 2005

 

Si Braxis mues der Morin als Regierigsroot verkauffe,
äär waibled umenander und losst Inseraat lo lauffe,
mir gänn em doo d Empfäälig, äär sell s Ganze nur syschtiere,
in vier Joor, mir sinn sicher, muess äär wiider braggtiziere.

Der Hakan Yakin, dää hets gschafft, s isch syt kuurzem duss:
äär seggled statt im Schwoobeland um e Boschporus.
Jetz gseet er scho sy Öpfel vo Blakaatwänd aabelache,
aber fir der Media Marggt kaa äär nie Wäärbig mache.

Beesi Buebe hänn em Munch si «Schrei» ganz aifach gstoole,
dä Helge, dää isch unersetzlig, dää kaa kain mee moole.
Mir hätte doo d Idee, die Biire kennt jo jeedes Kind:
Mached doch e Raame umme Zloczower sy Grind.

E schwaarze Bääse, rooti Lippe: d Lewinsky Monica.
Doo isch e Huffe Äänligs vo der Zanolari draa.
D Karrieere isch bi baide Wyyber zimli gstuucht,
denn si hänn, uf iiri Wyys, numme d Schnuure bruucht.

D Schwyz ligt in der Pisa-Studie jetz scho ganz wyt oobe,
der Gaischt isch, wenn me s zämme zellt, also dytlig ghoobe.
S isch allne glaar, vom Leerer bis zem Schieler, jeedem Wääse:
S duet sicher kain, wo Fortschritt macht, d Basler Zyttig lääse.

Die nei Regierig isch im Sahleweidli in der Kuur,
si mache deert so Grubbe-Zyyg, me sait däm au «Klausuur»,
der Jögge Schild, dää hietet Gaisse, d Herzog jagt e Haas,
der Conti sammlet flyssig Holz, d Schneidere frisst Graas,
der Lewin mälcht e Kue, der Morin, dää duet s Korn verryybe,
der Eymaa luegt in Spiegel, denn äär will dr Scheenschti blyybe.
Und d Moraal vo dääre Gschicht: Leeged eych an Laade,
und blyybed uff däm Buurehoof, deert machet er kai Schaade.

Syt kuurzem isch die ganzi Schwyz vo Tollwuet gänzlig frei,
drum glopft me sich uff d Schultere und macht e Riise-Gschrei.
Mir sälber hänn der guete Mäldig kai Vertraue gschänggt,
hett denn nundebuggel wiirgglig kain an Couchepin dänggt?

Mir sinn als Thescht im Graatissaarg scho go broobeliige,
Sii, das isch doch gaar nicht schlächt, das bysst jo ganz gediige,
s Ainzig isch: der Säägmäälstaub het uns verstigge welle,
drum geen mir s näggscht Mool in die fiechti Baanhoof-Basserelle.

Der Saarg isch bsetzt, doo liige zwai, die dien sich gaar nit schämme,
der Behring und d Anita Fetz – zelle d Schulde zämme.

Aine vom Verfassigsroot, e rächt betaggte Maa,
het scho vyyli langi Jeerli uff em Buggel ghaa.
Jetz het er s gschafft und äntlig Rue, aber s isch no ghaim:
der Soon, dää woont jetz nimm bi im, dää isch ins Altershaim.

Dää deert usse linggs, dää isch e weeneli schnäll gfaare,
und dää het zwai, drei Schliggli ghaa und styggt dernoo in Kaare,
äär leest nie e Byyljee, soo wie alli Optimischte.
Aadie zämme und bis bald, mer gseen is in der Kischte.