zurück

30 Joor Filzluus 2005

 

Anzahl Mitwirkende: 1
Comité-Bank seit 1974

 

 

Ych ha das Kunschtwärgg schnäll begriffe:
zmitts in Paris an Blocher schiffe!
Und drotzdäm find ychs biirewaich -
dä isch doch immun - geege jeede Saich!

S isch hitzedaags fascht wiene Fluech,
wär prominänt isch, schryybt e Buech.
Ych hoff, d Frau Fetz die losst das blyybe -
bi ihre längt e Ruggdrittsschryybe!

Dangg em FCB sym Transfer-Gschigg
hän mir mit neyje Spiiler Gligg.
Schlächter laufts mit Presidänte -
sunscht hätte mir nit esoone Änte!

Dr Fahrplanwäggsel isch vollzooge,
doch sythäär dien mi Zwyyfel blooge.
Fahr ych uff Ziri, sehn ys ko
lehn sy mi scho wider z Altstette stoh!

Ych ha mi gfroggt gha nundefaane,
wo luegt äggscht d Zanolari aane?
Normalerwyys het die doch schlicht
politisch e beschränggti Sicht!

Ellai und fascht e bitz vergässe
isch dr Federer näbem Gottschalk gsässe.
Är maint, är hoggt - s lyt uff dr Hand,
wie bim Syttewäggsel am Spiilfäldrand!

Den Aadlige sait me nit „Herr“ oder „Frau“,
das gilt fir die britisch Kronen au.
Zem Harry, wo sich als Nazi gfallt -
saisch statt „Durchlaucht“ jetz „Duureknallt“!

Kasch 0.5 – noch mym ermässe,
als Gränzwärt absolut vergässe.
Solang s kai Gsetz git wyt und brait
fir das was d Eva Herzog - niechter sait!

D BAZ isch jetz ai Farbepracht.
Gnau das ischs wo mir z schaffe macht.
Kai Mentsch bi dr BAZ het dänggt do dra –
ass ych jetz allimool e farbig Fiidle ha!

D Clarastroos isch jetz saniert,
s isch alles zämme flach planiert.
Lääde verschwinde, drum saag ych Ihne:
dert sehsch bald nyt me „näbe de Schiine“!

Uff em Hardturm wirsch kaini EM-Spiil see,
wäge däm griege d Zircher kai Ranzewee!
E Durchschnittszircher – wie mir ihn kenne,
dänggt sowieso nummen „ans Böögg verbrenne“!