zurück

Fäärimaa 2005

 

Anzahl Mitwirkende: 2
Comité-Bank seit 1998

 

 

Küürzlig frogt my so e junge Schnuufer
jää, goht das no lang bis zum andere Uufer?
Ych miesst das joo nit speziell verzelle
aber gfrogt hett äär das in dr „Passerelle“


Sie bruuche Beweegig, sunscht wäärde Sie z’digg
Sie sitze z’vyyl, me gseht’s uff ai Bligg
dryybe Sie doch Sport, bi Gläägehait
hett dr Huusarzt zum Hakan Yakin gsait


Dr Dieter Behring, das haltet fit
hilft in dr Wooghof-Kuchi mit
ai Wäärter sait ihm, das goht ihm nooch:
aber staple die Däller nit allzue hooch


Ych wott jo, liebi Brieder und Schweschtere
nit au no über dää „Combino“ läschtere
mit syner schöön griene Faarb, kai Grund, sich z’schämme
immerhin hebt die das Dramm no zämme


Für die näggschte Wahle, versprich ych Ihne
git’s e George W. Bush-Wäälmaschine
dass die funggtioniert, doo haany kai Bammel
s’isch e Basler-Erfindig vom Walter Hammel


Dr Oscar Camenzind im Rampeliecht
stellt fescht, es fallt ihm s drampe liecht
s hett öbbis bruucht, bis äär’s verschtoht
dasch maischtens soo, wenn’s abwäärts goht


Mit dr Kandidatuur in Regierigsroot
hett d’Frau Zanolari ganz Basel bedroht
vo däm häär sin mir doch no um dr Tschudi froh
hett äär kai Lugge hinterloh, bim goo


SUMMERLOCH

A. Nit numme s’Lotti, sunscht e Flotti
schiesst e Fotti vo däm Totti
wo dää graad macht, was äär nit sotti
jetz – woo aane mit dr Fotti

Au bi de Schwyzer, daas isch ney
doo isch dr Alex Frei so frey
äär gschpyyrt im Muul e bitz e Brey
und dänggt: Ych schpey

Als Spieler sottsch nit alles schlugge
und fir daas gitt’s kaini Gugge
yych glaub, die sueche, anschtatt dr Maischter
numme dr Europa-Klaischter


B. In dr BAZ muess no dr Sforza
syy blööde Text in d’Spalte knorza
doo kaasch bim Lääse, ohni z’liege
nach em Urs Hobi Sehnsucht griege

Die neu Grammatik macht ihm Mieh
die alt’ natürlig au – und wie
äär hett halt eerscht, drum kunnt’s verkehrt
bi Bayern München Hoochdeutsch glehrt

Haisst’s jetz „Yyfer“ oder „Eifer“
denn haisst’s au „Gyyfer“ und nit „Gaifer“
wir woll’n mal „gucken“ und nicht „gaucken“
sonst muss der Frei noch lernen „spaucken“


C. Dr Sforza schrybt die zwaiti Spalte
punggto Inhalt blybt’s bim alte
äär nutzt die Chance, doo isch äär aige
im Johann Vogel no dr Vogel z’zaige

Äär haig jetz gnueg, soo heersch ihn klaage
vo ehrevolle Niederlaage
jää, die gege Ängland, doo simmer im Soll
die isch weenigschtens nit ehrevoll!


Halb Europa wird verruggt
will d’Schwyzer Goolmaschine spuggt
doch bi dämm Spugge freut halt mi
s’isch immerhin e Dräffer gsi


D. Äär kaa’s jetz nümme für sich bhalte
dr Sforza schrybt die dritti Spalte
jetz wo äär’s merggt, d’BAZ duet’s jo drugge
schrybt äär nur no über’s Spugge

Dr Presidänt Zloczower nämmli
und sys Vize-Unschulds-Lämmli
die hänn nüt gseh, nüt ghöört – das kaa bassiere
wenn d’Funggtionäär nit funggtioniere

Um soo Skandal mit Schimpf und Schand
sin mir fascht froh bi uns im Land
was uns geniert sinn in dr Tat
numme d’Schwyzer Fuessball-Resultat


E. Sie göhn, wenn’s goht, bis in d’Kabine
im Beckham syny Konkubine
äär hett no gsait dehaim, dasch z’loobe
y haa e Usswäärts-Spiel hütt zoobe

Denn kunnt äär doch no haimschpaziert
frisch duscht, frisch pierct, frisch tätowiert
und sait, s hätt kuum besser könne laufe
Victoria, morn muesch joo kai Zytyg kaufe

Hett äär jetz noonig oder doch
mir sinn jetz z’mitts im Summerloch
und ziehn au s Beckhams duur dr Gaggo
- mit sportlichem Gruess – Ihre Ciriaco