zurück

Fäägnäscht 2005

 

Anzahl Mitwirkende:2
Comité-Bank seit 2005

 

 

I bi do letschti – aifach so – uff Schengen aabe gloffe
und haa uf däre ganze Streggi nie dr Chrischtoff droffe.
S Broleete und das Mobbing-Gschnuur längt nit fir soone Rais.
S bruucht d Gsinnig vo dr Calmy-Rey und d Wanderschueh vom DEISS.

Z Athen isch zvorderscht mit dr Fahne unsere Rodscher gloffe.
Do het me no zue Rächt uff e Medaille derfe hoffe.
Doch denn: kai Ass, kai Slice, kai Break, s isch aifach nyt meh gange.
Het är bim Fahneschwinge ächt e Tennisarm ygfange?

Ums Lääbe noonem Dood polemisiere d Religione.
Es git jo gwisi Hiwys uff Reinkarnatione.
d Tamara Wernli haig, das het e Forscherteam entdeggt,
vor 150 Johr im Sahlewaidli Aier gleggt.

Z Italie, z Irland und jetz neischtens au im Baselland,
do stelles di als Raucher in dr Baiz scho fascht an d Wand.
Drby tien d Schlooter d AHV doch zinftig finanziere.
Wenn das nit wär, miesst d Herzog wieder s Gold manipuliere.

En Änte fliegt vom Gundeli zmitts uff e Bahnhofplatz
und schnäderet mit eme Giggel dert, dasch ihre neischte Schatz.
Bim näggschte Rendez-vous hätt är so gärn zu ihre welle.
Doch wär nit schwimmt, dä kunnt nit iber unsri Passerelle.

Em Bischof Koch sy Seggelmaischter warnt sy Diözeese:
„Die Kirche het Finanzbroblem, mer mien si ändlig leese.
Das Oobemohl mit Broteschtante stelle mir jetz ab.
Die dringgen is no unsre letschte Château-Neuf-du-Pape.“

Ych stand uff Kunscht, ych haa dehaim en ächte Niggli Steggli,
e Dooteninsle, unsigniert, wohrschynts vom Arnold Beggli,
vom Joseph Beuys zwai Spiegelaier und drei Moorekepf;
und s Prunggstigg isch e Loode-Cape mit ächte Hirschhorn-Gnepf.

Dr Grossdail vo de Lyt, wo mit so Kirzel um sich schmaisst,
het iberhaupt kai Ahnig, was die Abkirzig au haisst.
Zem Byspiil BVG, das haisst Bangsions-Verspräche-Gfasel.
Und noone Byspiil: VKB haisst Vraue-Klique Basel.

So Fläsche, Biggse, Bächer wärde aifach aanegschmisse.
Und mahnsch e Typ zer Oornig, duet dä nur s Muul bleed verrisse.
Uff Aastand drillt sinn d Nati-Elf in Sache Sauerei:
Ganz heeflig sait dr Alex dert: „I spei, i bi so Frei.“

Mi Maa het letschti gsait: „Kasch wähle zwische grien und rot.“
Ych haa denn gfrogt: „Was soll jetz das? Zum Wähle isch s doch z spoot.“
Druff het är gmaint: „Du hesch d Begoobig, alles lätz z verschtoh.
Ych haa dir doch nur welle e Nespresso uuseloo.“