zurück

Dootebainli 2005

 

Anzahl Mitwirkende: 4
Comité-Bank seit 2005

 

 

Dr glai Nemo, dä isch aifach so verschwunde
Mir hänn en gsuecht und gsuecht und aifach nimmi gfunde
Ganz verzwyyfled sinn mer gsii und hänn dr Zuug fir haim nää welle
Uffsmool schwimmt äär grad vor uns duur d Basserelle.

Dangg em Schwyzer Fäärnsee wisse miir und Sii
Wie zu Gotthälfs Zyte s Lääbe so isch gsii
Jetz git’s e neii Sändig iber s alte Rom – es isch e Gruus:
Gladiadoorekämpf – “live” us em Bundeshuus.

D SVP, die waarnt die Lingge und die Nätte:
In zwanzig Joor mien alli doo zu Allah bätte!
Jo, denn singt dr Schorsch vom Haafebeggi zwai – nai Sii, das Drama
Denn als Sidi Abdel Assar vo El-Hamma.

Vom Wysse Huus isch geschtert schlimmi Nooricht koo:
Dr Dschordsch W. Bush, dä haig e Schleegli iberkoo.
Hit haisst’s, es syyg numme Migrääne, doch mir hänn nie Soorge ghaa:
Wenn d kai Hiirni hesch, kaasch au kai Hiirnschlaag haa.

Wie me sym Maitli nur „Tsunami“ saage kaa
Mir finde s zwoor nit schlimmer als „Angelika“
Sy Kind noch Katastrooffe z dauffe isch bi uns kai Neiikait
Wil me z Baasel alle Glaine „Bush-i“ sait.

Dr Staatssaarg haig schiints numme Säägmääl uff em Boode
Drum kemme Luxussäärg jetz wider grooss in Moode
Säärg us Maarmel, Gold, mit Fäärnsee, aine wo noch Schoggi schmeggt
Und fir d Raaser – git’s dr Saarg au dieffer gleggt.

In St. Pölten dien si beesi Brieschter jaage
Au in Baasel goots dr Kiirche jetz an Graage
S git e Skandaal, es haisst, me haig bim Bischof Koch im Käller unde
Ganz verstaubt drei Michael Jackson-Blatte gfunde.

„Ich gsee eppis, wo du nit gsees, und s is grien
Nai wart, s is gääl, nai wyss, nai, halt, doch wider grien
Jä nai, s is blau-root, nai, doch oorangsch…“ dr Fritzli riefft: „das sinn doch Pfyffe,
So kaa-n-i d Faarb vo dääne Drämli nie bigryffe!“

Dr Moosi, dä isch doot und s Daisy das isch druurig
Dr Bush dä schiggt e Granz und schrybt: „Mir findes schuurig
You are a Held for us, Sir Mooshammer, und iire Doot macht Sinn
You have bewiise, dass d Iraker gfeerlig sinn!“

Dr Tutanchamun het vyyl Gäld noch Baasel gloggt
Het s’Fluugi haim gnoo, ooni dass en epper frogt
Är hoggt uff d’Schnuure, sitzt mit Bänder gfesslet doot im Sarkophaag
Dasch en Ussländer wie-n-en dr Blocher maag.

Geschter haan i alli myyni Noochbere dätscht
Hit dr Chef, d’Koleege, d’Frau und d’Kinder brätscht
Ich haa – wil si mi vilicht in Zuekunft hätte welle schloo
Wie dr Bush e Präventivschlaag unternoo.

Dien au Sii no uf das Migros-Budget schweere
Oder sich doch zum „Prix Garantie“ bekeere?
Au dr Denner und dr Pick Pay dien aim alles ginschtig gää –
Do kennt sich d BVB emool e Byspiil nää!

Dr Baasler Mässduurm, dä duet alles iberraage
Das schloot de Ziiriheegel gruusig uf e Maage
Jetz wänn si au so aine baue, jä mir wintsche vyyl Vergniege
Wil die nit emool e Stadion feertig griege.

Wil niemer en me gäärn haig, usser syyner Frau
D Koleege em nit hälffe, sait dr HaMa: „Tschau“
D Boscht, die bringt e Maargge uuse, als Drooscht fir dä armi Dropf
Us em Danneholz – vom Brätt doo vor sim Kopf.

D Emine Yakin, die isch friener Dreiraad gfaare
Jetz wuurd si schyynts uf e schygge Renner spaare
Si trainiert mit em Lance Armstrong, jeede Daag in letschter Zyt
Dr Wääg uf Istanbul zem Hakan, dää isch wyt.

Die nei Miss Schweiz die het emool – heerjeemynee
E Fotti vo sich gmacht ghaa – ganz ooni Büstjee.
Mir finde nit, dass sich dää ganzi Mais do wäg däm Fotti looni
D Zanolari isch jo s ganz Joor „oobe-n-ooni“