zurück

Doggter FMH 2005

 

Anzahl Mitwirkende: 2
Comité-Bank seit2005

 

 

D Passerelle duet bi dr vierte Weiche,
nach jedem Rääge wie ne Seechbeggi saiche.
Numme Pfusch und nassi Wänd:
die Planer sin hochgradig inkontinänt.

Diagnose:
Dr Christo, dä het denn e Zagge,
will d Passerelle in Windle pagge.


I ha vome Ziircher e paar Stammzälle gnoh,
und se denn in sone Deesli iine doo.
Do duen i jetz, ich will ech's brichte,
E riisegrossi Schnuure zichte.

Diagnose:
Wenn's e Stigg Hirni setti gää,
darfsch keini Ziircher Zälle nää.


D Frau Zanolari het mr e Stigg Hirni gschiggt,
si well wisse, wo si IQ-meesig ebbe liggt.
I ha'n ere denn aaglitte: Das chene si vergässe,
wo nyt isch, chasch au nyt mässe.

Diagnose:
Jetzt weiss me, worum die im Grosse Root,
esone Schissdrägg uuseloht.


Sin si allergisch uf d SVP,
und nämme wäge däm Kamilletee?
Trinke si Rhywasser, das macht Sinn:
S het Antidepressiva drin.

Diagnose:
Vo dr SVP git's sone Huffe,
do muesch dr ganzi Rhy ussuffe.


Dr Hamatschu hän's mr do letschti gschiggt,
i han em s rächte Bei wiider gfliggt.
Vor em 2. Wahlgang, s isch unbestritte,
het er plötzlig en Ermiedigsbruch erlitte.

Diagnose:
Wenn i lueg,
was dä gschafft het, denn sehn is glii:
Also - en Ermiedigsbruch cha das nit sii!


Au d DSP het's “tschuuderet“,
so fescht, ass si jetzt muuderet.
Jetzt liggt si, das isch ganz brutal,
mit schwerer Schwindsucht im Spital.

Diagnose:
Dr Karli Schnyder, i mach e Wett,
Sitzt Tag und Nacht am Krankebett.


Lut Bligg wird in dr Schwiz s Sperma rar,
Worum und wiesoo - dasch nooni glaar.
Drum will au i mi Biitrag bringe,
Und s neggscht Johr als Soomebangg go singe.

Diagnose:
Und bi de Baselbieter Rammle,
Duet dr Tierarzt s Sperma sammle.


Bi jedem Schwoob doo inne sett i none DNA-Prob nää,
Dä Ufftrag het mr dr Bundesroot Blocher perseenlig gää.
Aer well gnau wisse, seit er trogge,
Uf welem Stuehl Verwandti hogge.

Diagnose:
Dr Ueli Muurer seit: Gottloob
Bin i au e halbe Schwoob.


Die neie Combino, s'isch allerhand,
Gheie nach eim Johr scho fascht usenand.
I mach do schnäll e Färndiagnoose:
Die Trämli hän im höggschte Grad Osteoporose.

Diagnose:
In jedem Fiehrerstand het's, fir alli Fäll
E Tube Cementit - und zwar dr schnäll!


Dr Hakan, dä duet wandere,
vo eim FC zum andere.
Das Liide isch klar, bi däm junge Maa:
Dä muess e Wanderniere haa.

Diagnose:
Die Wanderniere isch bi däm,
wo andri Lyt suscht s Hirni hän.


Dr Gimenez chunnt zue mr, zmitts in dr Nacht,
s isch, will er keini Gool meh macht.
I ha uusegfunde, was s chennt sii:
Dä het e Läderallergie!

Diagnose:
Dr einzig Root, wo'n i cha gää:
Dä soll e Plastikballe nää!


D Huebere us dr Gieterstrooss,
verzellt em Tierarzt, dasch kurioos:
Mi Sennehund, dä mit de chrumme Schaiche,
duet neischtens an mi Blocher saiche.

Diagnose:
Do saag i ihne, vo Frau zu Frau,
jä. sii - mi Fiffi macht das au.