zurück

Die Lange Naaase 2005

 

Anzahl Mitwirkende: 3
Comité-Bank seit 2005

 

 

E guete n Oobe, mir drey sinn die LANGE NAAASE
Mir sinn nei und dorum in ere heikle Phase
Mir gänn is Mie, so wie das unseri Schi-Ass mache
So kenne mer sicher sy, so hänn d ihr eppis z – hyyle

So Büs mit Drööt ka sich d Stadt Basel nümm erlaube
Us Kostegründ – nur könne mir das nit rächt glaube
Wär sy NAAASE dry steggt, dä ka usefinde
Die bruuche Drööt zum ihri Drämmli zämme binde.

Mir begriffe nit das Gschiss um s Gschäft im Haafe
Scho kleini Kinder schisse Gschäftli in e Haafe
Es git e Regle, wo sich immer duet bewääre
He joo, wenn s stinggt im Haafe, Ralph, denn muesch en lääre

Bi Innovazione do isch Basel immer stark
Mit Geothermie sin mir energetisch bald autark
Si boore tief und tiefer und ganz z unterscht unde
Hänn si grad no s Niveau vo dr Basler Zytig gfunde

Es hänn e baar Lyt vor em Papstbsuech in dr Schwyz
Däm sy Ruggtritt gforderet, das isch doch e Witz
Dä isch e Sonderfall, und zwar ganz e klare
Dr Papst ka nit zruggträte, dä ka nur no faare.

Dr hüttig Oobe und die Fasnacht miend ihr gniesse
S isch wohl die letschti, denn bald wärde mer miesse biesse
S isch nit z vermiide, e Krieg stoot uns ins Huus
Denn lut dr BaZ goot d „Axe des Bösen“ zmitzt durch Buus

Dr Fillipp Dääge losst rächts usse alli stoo
Äär dribblet, flankt, schiesst Gool – und jetzt löön die dä goo
Dr rächti Flügel tür verkaufe, Sie das goot
Und s bringt no Stutz, dää Tipp gänn mir em Bundesroot

Im wysse Huus hänn si Problem, e ganz e Huffe
Bis zum Hals und d Gfohr isch gross, dört drinn z versuffe
Dass die dr Bush gwählt hänn, das könne mir verstoo
Dä isch e so hool, dass äär nit ka untergoo

Mir finde in dr Erlematt e grosse See
Unter uns gseit absolut die bescht Idee
Doch wurde mir dä See grad so gross usprobiere
Dass me Züri miesst nach Ööschtryych evakuiere

So wie dr Beckham als dr Josef glatt e Hoon isch
Wär us em FCB e Krippe zimlig komisch
Dr Christian Gross als Josef, stellet euch das voor
Wie gsäächt das us, e Josef mit so wenig Hoor
S isch völlig klar, als was dr Zubi umme stoot
Dää isch en Ox, was dä sit neustem iineloot
Für in Stall lade mir no dr Hakan ii
Dä könnt e so wie gwohnt au do en Esel sii
Dr Werner Edelmaa als Hirt, das passt nit rächt
Derfür miecht äär sich als e Schööfli gar nit schlächt
Die drey Weise, die hän’s zittlig nümmi gschafft
Denn die sin in Züri immer no in Haft
Und d Gigi Oeri als Maria hätt me gärn
Goot leider nit, die Gueti spielt jo scho de Stärn

Weeli Partei de wähle willsch, das kunnt druff aa
So wie me Öpfel nit mit Biire vergliiche kaa
E Minimum erwarte mir im Zämmespiil
Im Gegesatz zur SVP hänn Öpfel Stiil

Kochsch e Meeresfrüchte-Gricht nimmsch Fond vom Fisch
Mit bitzli Wildfond bringsch e Herbst-Gricht uf dr Tisch
Winkt ein mit grosser Kelle wo vyyl mee verspricht
Kocht dä mit Behring-Fond und sitzt bald au vor Gricht.

E wissi Fasnacht hesch in Basel lang nümm gsee
syt em Morgestraich fallt immer wieder Schnee
das isch super, rieft d Frau Fetz, das mues i teste
ich gang an d Fasnacht, das git e wissi Weste.

E gueten Abgang mache, das isch immer wichtig
Mir hänn e Vorbild gsuecht, denn kunnt das sicher richtig
Mir maches wie dr Tschudi und das goot e soo:
E LANGI NAAASE mache – und denn eifach goo.