zurück

Blauäugige 2005

 

Anzahl Mitwirkende: 3
Comité-Bank seit 2000

 

 

Mir blaue Auge wünsche euch e schööne guete Oobe,
exgüsi, aber mr möchte gärn mit Iine öppis proobe:
Hängge Sy em Nochber yy und är sich au bi Iine
Nai, jetz föön sy nit aa schunggle – das wär näbe de Schiine.

Mir hän dr Murat interviewt und gschyydy Frooge gschtellt,
dä het mit sanftem Lächle dr gröschti Saich verzellt.
D Chaote fänd är nit so schlimm, ihm wurd vyylmee schtingge,
ass jede Taxifaarer meint, är sott kai Tee go dringge.

Wotsch als Grossroot öppis saage, griegsch no fünf Minute,
wennd e bitzli lenger machsch, zien si böösi Schnutte.
D Daiana schrybt im Daagebuech: wär hätt so öppis dänggt,
em Charles do heige all drei Wuche – drei Minute glänggt.

Sprichwörter sin e ryche Schatz, hämmer gleert dehei,
sy stimme alli bis uf eins: e Luug heig kurzi Bei.
Wenn das nämmlig stimme wurd mit de kurze Haggse
wär im Bush sy Fudy mit de Zeche zämmegwaggse.

Sit s Flusspfärd s Zebra bisse het, draumt äs wildi Sache,
es wälzt sich schtändig hi und här und ka au nümmi lache.
Dr Zollidoggter het d Ydee und zwar e wunderbari:
„Dängg nid es syg dy Zebrafründ -, dängg s sig d Zanolari.“

Dr Gross stoot an dr Sytelyynie, winggt und zupft am Graage
ziet dä Grufti – numme Luft yy – möcht er öppis saage?
Bim Cup-Matsch z Thun längt är an Kopf - denn foot er afo flueche:
„Zem Hoor-Uusrysse isch es – gopf“ - denn foot er afo sueche.

Dr Schumi schänggt im Papscht s Modäll vomene Ferrari,
dä danggt und seit mit brochner Schtimm, ass er nümmi faari.
Jetz könnt dr Papscht em Hamatschu das Spylzügauti gää,
dr Hamatschu zeigt iim derfür, wie me dr Huet ka nää.

Hän welle e Värs übere Blocher mache, pointeryych und dicht,
hän welle übere Blocher lache – dä armi ryychi Wicht.
Hän ys gfrogt: „Was duet däm weh? - Was meine Dir - was wär s ?
Genau – das hämmr au so gseh – drum mache mer kai Värs.

S het eine welle Basler wärde, d Priefig isch ächt bschisse,
d Regierigsrööt vom letschte Joor - sott dä arm Kaib wisse.
„Y sag dr, Mann, s sin siibe Mann, - und Eymann kenn y au
und fünf Mann hän e Schnauz, he Mann, und ai Mann isch e Frau.“

D Eva het dr Adam mit em Öpfeli verfiert,
denn het si gsait, die böösi Schlange heig si animiert.
Eso isch d Sünd uf d Aerde ko, au z Basel koscht das Närve:
denn jetz verteilt sy in dr Stadt, statt Öpfel, Goldresärve.

Dr Hakan seit am Delifoon zer Mamme z Münggestai:
„Y verdien my ekmek bi Galatasaray,
s Auti nimm i nit dörthi, doch wär y schampar froo,
y könnt vo Dir zum ummefaare s Dreiraad überkoo.
Groobi Lehrer, frächi Schieler, Schleeger und Sadischte,
Aktiegauner, Dealer, Räuber, Raser und Rassischte,
die tryybe mir zem Bahnhofblatz und setze unsri Schmiir yy
und pagge denn das ganzi Pagg – in Aextrazug uff Ziiry.

S Drämmlifaare isch düürer worde – mir dien das verstoo,
d Combino hän dr BVB die letscht Resärve gnoo,
doch Lyym in d Automate drugge, das isch ganz drnääbe,
gänd dä Lyym dr BVB zum Drämmli zämme glääbe.

Mir wünsche Iine wyterhi e schööne guete Oobe,
mir mien Sii leider jetz verloo – mer wänn no zu de Schwoobe.
Dört singe mer kei Schnitzelbangg – Iir wärdet das begryffe,
mir wänn – blauäugig, wie mer sin – däne leere pfyffe.